ᐃᓄᐃᑦ ᐱᒻᒪᕆᐊᓂᖅᐹᕆᔭᖏᓐᓄᑦ ᑐᕌᖓᔪᑦ

ᑕᐃᒫᒃ ᐊᓯᔾᔩᑎᑦᓯᒍᓐᓇᕐᓗᑎᒃ, ᑖᑯᐊ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᑦ ᐱᒋᐊᖃᖅᑎᑦᓯᕗᑦ ᐱᔮᕆᓪᓗᑎᒃ ᓯᕗᒧᐊᑉᐸᓪᓕᐊᔪᑦ ᐅᖓᑖᓄᑦ ᐱᑕᖃᕇᖅᑐᑦ ᑲᒪᒐᓱᐊᕈᓯᕐᓂᒃ, ᐋᖅᑭᓱᖅᑕᐅᓯᒪᔪᓂᒃ ᐊᒻᒪᓗ ᑲᒪᒍᓯᐅᖃᑦᑕᖅᑐᓂᒃ ᑕᐃᒫᒃ ᓈᒻᒪᑦᓯᐊᑐᐊᖅᑲᑦ. ᐃᒫᒃ ᓇᓗᓇᐃᖅᓯᕗᒍᑦ ᐃᒪᐃᓪᓚᕆᒋᐊᖓᓂᒃ ᑕᒪᒃᑯᐊ ᐃᓄᐃᑦ ᐊᖏᖃᑎᒌᓐᓂᒃᑯᑦ ᑎᒥᖁᑎᑖᕆᔭᐅᔪᑦ ᐊᒻᒪᓗ ᑲᓇᑕ ᐱᒋᐊᖃᓚᖓᐳᑦ ᐃᖅᑲᓇᐃᔭᖃᑎᖃᕐᓂᕐᒥᒃ ᑕᒪᒃᑯᓂᖓ ᐳᕌᕙᓐᓯᓂᒃ ᐊᒻᒪᓗ ᐊᕕᑦᑐᖅᓯᒪᔪᓂᓪᓗ ᒐᕙᒪᓂᒃ ᑕᐃᒫᒃ ᑲᔪᓯᑦᓯᐊᖁᓪᓗᒍ ᓯᕗᒧᐊᑉᐸᓪᓕᐊᑎᑦᓯᓂᖅ ᐅᑯᓂᖓ ᒪᓕᒃᑐᓂᒃ ᐱᒻᒪᕆᐅᓂᖅᐹᕆᔭᐅᔪᓂᒃ ᐊᑐᑦᓯᐊᖁᓪᓗᒋᑦ ᐊᑯᓂ−ᐊᑐᖅᑎᑕᐅᓚᖓᔪᑦ ᐊᒻᒪᓗ ᑲᔪᓯᓯᒪᑦᓯᐊᕈᓐᓇᕐᓗᑎᒃ ᓈᒻᒪᓯᐊᕐᓂᓖᑦ ᐊᓯᔾᔨᕐᓂᐅᔪᑦ.

1. ᐱᖁᑏᑦ

ᐅᕙᓂ ᐊᕕᑦᑐᖅᓯᒪᔪᓂ ᓇᓗᓇᐃᔭᐃᓯᒪᔪᑦ ᑕᒪᒃᑯᓂᖓ ᓱᓇᖁᑎᒻᒪᕆᓐᓂᒃ ᐱᒻᒪᕆᐅᓂᖅᐹᕆᔭᖏᓐᓂᒃ ᐃᓄᐃᑦ ᓄᓇᖓᓐᓂ ᐊᑦᑐᐊᔪᑦ ᑕᒪᑐᒧᖓ ᐃᖅᑲᖅᑐᐃᕕᓕᕆᓂᕐᒧᑦ. ᓱᓇᖁᑎᒻᒪᕇᑦ ᑕᒪᒃᑯᐊ ᐱᒻᒪᕆᐅᕗᑦ ᑕᐃᒫᒃ ᐊᑦᑕᓇᓐᖏᑦᑐᒦᖁᓪᓗᒋᑦ ᓄᓇᓖᑦ. ᐱᕚᓪᓕᖅᑎᑕᐅᓂᖏᑦ ᐃᓯᕐᕕᑦᓴᐃᑦ ᐃᓪᓗᐃᑦ, ᓯᓂᑦᑕᑲᐃᓐᓇᕕᑦᓴᐃᑦ ᐊᒻᒪᓗ ᓄᑦᑎᐸᓪᓕᐊᔪᓄᑦ ᐃᓪᓗᑦᓴᓂᒃ ᐊᒻᒪᓗᑦᑕᐅᖅ ᓄᓇᓕᓐᓂ ᐱᓐᖑᐊᕕᐅᓂᕐᒧᑦ ᓇᔪᒐᐃᑦ ᑕᒪᒃᑯᐊ ᐱᒻᒪᕆᐅᕗᑦ ᒥᑭᓪᓕᑎᖅᑕᐅᖁᓪᓗᒍ ᑲᒪᒋᔭᐅᖃᑦᑕᕐᓃᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᓱᖅᑕᐅᓯᒪᔪᓄᑦ, ᓱᔪᖃᓯᖃᑦᑕᖁᓇᒍ ᐱᕋᔭᓐᓂᕐᓂᒃ ᐊᒻᒪᓗ ᓴᐳᔾᔭᐅᓗᑎᓪᓗ ᖃᓄᐃᒍᓐᓃᕋᓱᐊᖅᑐᑦ ᑕᒪᒃᑯᐊ ᐱᕋᔭᑦᓯᒪᔪᑦ. ᖄᒃᑲᓐᓂᐊᒍᑦ, ᓈᒻᒪᓯᐊᖅᑐᓂᒃ−ᐊᑐᕐᓂᖃᕈᓐᓇᖅᑐᓂᒃ ᐃᓄᐃᑦ ᐃᖅᑲᖅᑐᐃᕕᓕᕆᓂᕐᒧᑦ ᐅᐸᒐᐃᑦ ᐃᑲᔪᖅᑕᐅᒋᐊᖃᓚᖓᕗᑦ ᐱᕚᓪᓕᖁᓪᓗᒋᑦ ᐱᕕᑦᓴᐅᒍᓐᓇᕐᓂᖏᑦ ᑕᒪᒃᑯᓂᖓ ᐃᖅᑲᖅᑐᐃᕕᓕᕆᓂᕐᒨᖓᔪᓂᒃ ᑕᒪᒃᑯᓄᖓ ᐃᓄᓐᓄᑦ.

1.1 ᑲᔪᓯᑎᑕᐅᓯᒪᓗᓂ ᑲᒪᖃᑎᒋᔭᐅᓂᖏᑦ ᑕᒪᒃᑯᐊ ᐃᓄᐃᑦ ᐊᑐᓕᖅᑎᑕᐅᒐᓱᐊᕐᓗᑎᒃ ᐃᓪᓗᓄᑦ−ᐊᑦᑐᐊᔪᑦ ᐃᓄᐃᑦ ᐅᓪᓗᒥᐅᓕᖅᑐᖅ ᐊᖏᖃᑎᒌᒍᑎᓅᖓᔪᑦ ᐊᑐᖅᑎᑕᐅᒋᐊᖃᕐᓂᖏᓐᓄᑦ, ᐊᒻᒪᓗ ᐊᑐᖅᑎᑦᓯᓗᑎᒃ ᑕᒪᒃᑯᓂᖓ ᐃᓄᐃᑦ−ᒐᕙᒪᖏᓐᓂᒃ ᑲᒪᖃᑎᖃᕐᓂᕐᒧᑦ ᑲᑎᒪᔨᕋᓛᑦ (ICPC), ᑲᔪᓯᑎᑕᐅᓯᒪᓗᓂ ᑲᒪᖃᑎᒌᓐᓂᐅᔪᖅ ᑕᒃᑯᐊᓗ ᐃᓄᐃᑦ ᐊᑐᓕᖅᑎᑕᐅᓗᑎᒃ ᑕᐃᓐᓇ 2019 ᐃᓄᐃᑦ ᓄᓇᖓᓐᓂ ᐃᓪᓗᓕᕆᓂᕐᒧᑦ ᐊᖅᑭᑦᓱᐃᑎᐅᒐᓱᐊᖅᑐᖅ ᑲᒪᖃᑎᒌᑦᑐᓄᑦ−ᐱᕙᓪᓕᐊᑎᑕᐅᓯᒪᔪᖅ ᑖᒃᑯᓄᖓ ᐃᓄᓐᓄᑦ ᐊᒻᒪᓗ ᑲᓇᑕ, ᑕᐃᒫᓪᓗ ᖃᐅᔨᒪᓇᖅᑐᖅ ᐃᓕᓴᖅᓯᓯᒪᒋᐊᖏᓐᓂᒃ ᑕᐃᒫᒃ ᑲᔪᓯᓯᒪᑎᑕᐅᓂᕆᔭᖏᑦ ᐊᐃᒍᓕᕇᑦᑐᑦ ᐃᓪᓗᑦᓴᐃᑦ ᑕᐃᒫᒃ ᐱᒋᐊᖃᓪᓚᕆᑉᐳᖅ ᑲᔪᓯᓯᒪᑦᓯᐊᖁᓪᓗᒋᑦ ᐃᓪᓗᑦᓴᐃᑦ ᐱᔭᐅᒋᐊᖃᖅᑐᑦ ᐊᒻᒪᓗ ᓇᓗᓇᐃᖅᓯᓪᓗᓂ ᐊᖏᓪᓕᒋᐊᖅᑕᐅᒋᐊᖃᕐᓂᖏᓐᓂᒃ ᑕᒪᒃᑯᐊ ᓄᑦᑎᕋᓱᐊᖅᑐᓅᖓᔪᑦ ᐊᒻᒪᓗ ᓴᐳᔾᔨᓯᒪᒐᓱᐊᕈᑏᑦ ᐃᓪᓗᐃᑦ ᑕᐃᒫᒃ ᓂᕆᐅᒋᔭᐅᓪᓗᑎᒃ ᐊᓚᒃᑲᕋᔭᕆᐊᖏᑦ.

1.2 ᐱᐅᓯᕚᓪᓕᑎᑦᓯᓂᖅ ᐱᕕᐅᒍᓐᓇᖅᑐᓂᒃ ᑕᒪᒃᑯᓂᖓ ᐃᓕᖅᑯᓯᓕᕆᓂᕐᒧᑦ ᐊᑦᑐᐊᓂᖃᖅᑐᓂᒃ ᐃᖅᑲᖅᑐᐃᕕᓕᕆᓂᕐᒧᑦ ᐱᔨᑦᓯᕋᐅᑎᓂᒃ ᑖᕙᓂ ᐃᓄᐃᑦ ᓄᓇᖓᓐᓂ ᐊᒻᒪᓗ ᓄᓇᓕᐸᐅᔭᓃᑦᑐᓂ ᐊᒻᒪᓗ ᐱᒐᓱᐊᖅᑐᖃᕐᓗᓂ ᐊᖏᓪᓕᕆᐊᖅᑕᐅᓂᖏᓐᓂᒃ ᐱᑕᖃᕇᖅᑐᑦ ᐃᖅᑲᖅᑐᐃᕕᓕᕆᓂᕐᒧᑦ ᑲᒪᑎᑦᓯᒍᑏᑦ ᐊᒻᒪᓗ ᐱᔨᑦᓯᕋᐅᑎᓂᓪᓗ ᑕᐃᒫᒃ ᐃᓚᒍᑦᓯᐅᔾᔭᐅᖁᓪᓗᒋᑦ ᓴᐳᔾᔭᐅᓯᒪᓂᖏᑦ ᑕᒪᒃᑯᐊ ᐃᓄᐃᑦ ᓄᓇᓕᓐᓂ ᐃᖅᑲᖅᑐᐃᕕᓕᕆᓂᕐᒧᑦ ᐅᐸᒐᐃᑦ ᑕᐃᒫᒃ ᐱᒍᓐᓇᖅᑎᑕᐅᖁᓪᓗᒋᑦ ᑕᒪᒃᑯᐊ ᐃᓄᓐᓄᑦ−ᑐᓐᖓᕕᖃᖅᑐᑦ ᐃᖅᑲᖅᑐᐃᕕᓕᕆᓂᕐᒧᑦ ᐱᔨᑦᓯᕋᐅᑏᑦ ᓵᓐᖓᔭᐅᖁᓪᓗᒋᑦ ᑕᒪᒃᑯᐊ ᐱᒋᐊᓕᖏᑦ ᑲᒪᒋᔭᐅᖃᑦᑕᖅᑐᑦ ᑖᒃᑯᓄᖓ, ᐅᕝᕙᓘᓐᓃᑦ ᐅᓗᕆᐊᓇᖅᑐᒦᑦᑐᑦ ᑲᒪᒋᔭᐅᓂᕐᒧᑦ ᑕᒪᒃᑯᓄᖓ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᓱᖅᑕᐅᓯᒪᔪᓄᑦ, ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᑦᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ.

2. ᓴᐳᔾᔭᐅᓯᒪᓂᖏᑦ ᐃᓄᐃᑦ ᓄᓇᓕᖏᑦ ᖃᓄᐃᓐᖏᑦᓯᐊᖁᓪᓗᒋᑦ

ᑖᒃᑯᐊ ᐊᕕᑦᑐᖅᓯᒪᔪᑦ ᐊᓚᒡᒐᐃᑎᑦᓯᒐᓱᐊᖅᑯᑦ ᓱᔪᖃᑲᓪᓚᑦᑕᐃᓕᑎᑦᓯᓂᕐᒥᒃ ᐊᒻᒪᓗ ᐊᕙᓗᑦᓯᓯᒪᔪᑦ ᓴᐳᔾᔨᓯᒪᒐᓱᐊᕈᑏᑦ ᑕᐃᒫᒃ ᐃᑲᔪᖅᓯᓯᒪᖁᓪᓗᒋᑦ ᓱᔪᖃᑲᓪᓚᑦᑕᐃᓕᑎᑦᓯᓂᕐᒥᒃ ᐱᕋᔭᓐᓂᐅᔪᓂᒃ ᐊᒻᒪᓗ ᓴᐳᔾᔭᐅᓯᒪᓗᑎᒃ ᓄᓇᓖᑦ ᖃᓄᐃᓐᖏᑦᓯᐊᖁᓪᓗᒋᑦ. ᓱᔪᖃᑲᓪᓚᑦᑕᐃᓕᑎᑦᓯᓂᕐᒧᑦ ᓴᐳᔾᔨᓯᒪᒐᓱᐊᕈᑏᑦ ᓇᓗᓇᐃᔭᐃᔪᑦ ᐅᕙᓂ ᐊᕕᑦᑐᖅᓯᒪᔪᓂ ᑕᑯᑎᑦᓯᔪᑦ ᑕᒪᒃᑯᓂᖓ ᐃᓄᒃ ᐃᓱᒪᒋᔭᐅᒋᐊᖃᕐᓂᖓ ᐊᑕᖏᖅᑐᒥᒃ ᑲᒪᒋᔭᐅᖁᓪᓗᒍ ᖃᓄᐃᓕᖓᓂᕆᔭᖏᑦ ᑕᒪᓐᓇ ᐱᕋᔭᓂᕐᓂᒃ ᓱᔪᖃᑲᓪᓚᑎᑦᓯᑕᐃᓕᑎᑦᓯᓂᖅ ᐊᒻᒪᓗ ᓇᓗᓇᐃᖅᑕᐅᓗᑎᒃ ᐊᖅᑭᑦᓱᐃᑎᐅᒍᓐᓇᖅᑐᑦ ᑕᐃᒫᒃ ᐱᐅᓯᕙᓪᓕᖁᓪᓗᒋᑦ ᐃᓄᐃᑦ ᖃᓄᐃᖃᑦᑕᕐᓂᕆᔭᖏᑦ ᐊᒻᒪᓗ ᖃᓄᐃᓐᖏᑦᓯᐊᖁᓪᓗᒋᓪᓗ.

2.1 ᓴᐳᔾᔨᓯᒪᒐᓱᐊᕈᑏᑦ, ᐊᖏᓪᓕᒋᐊᖅᑕᐅᓂᖏᑦ ᐊᒻᒪᓗ ᐃᖏᕐᕋᑎᑕᐅᓂᖏᓪᓗ ᐃᓕᖅᑯᓯᓕᕆᓂᕐᒧᑦ ᓴᓇᒪᓂᖃᕋᓱᐊᖅᑐᑦ ᑲᒪᑎᑦᓯᒍᑎᑦ ᐱᐅᓯᕚᓪᓕᖁᓪᓗᒋᑦ ᓄᓇᓖᑦ ᖃᓄᐃᓐᖏᑦᓯᐊᕐᓂᕆᔭᖏᑦ, ᐱᕋᔭᑦᑐᖃᖁᓇᒍ ᓱᔪᖃᑲᓪᓚᑦᑕᐃᓕᒪᑎᑦᓯᒍᑏᑦ ᐊᒻᒪᓗ ᒪᒥᓴᕐᓂᕐᒨᖓᔪᑦ, ᑲᒪᖃᑎᖃᕐᓗᑕ ᑕᒪᒃᑯᓂᖓ ᐃᓄᓐᓂᒃ ᐊᒻᒪᓗ ᐳᕌᕙᓐᓯᓂᒃ ᐊᒻᒪᓗ ᐊᕕᑦᑐᖅᓯᒪᔪᓂᓪᓗ. ᑖᒃᑯᐊ ᐃᓚᒍᑦᓯᐅᔾᔨᒍᓐᓇᖅᑯᑦ:

2.2 ᓴᐳᔾᔭᐅᓯᒪᓂᖏᑦ ᐱᕕᖃᖅᑎᑦᓯᒍᑏᑦ ᑕᒪᒃᑯᓂᖓ ᐃᖅᑲᖅᑐᐃᕕᓕᕆᓂᕐᒨᖓᔪᑦ ᑕᒪᒃᑯᓄᖓᖓᔪᑦ ᐃᓄᓐᓄᑦ ᐃᓗᓯᖅᓱᓯᐊᓐᖏᑦᑐᓄᑦ, ᑕᐃᒫᒃ ᑐᕌᖓᓂᖃᖅᑐᓂᒃ ᒥᑦᓵᓄᑦ ᐃᓄᓐᓄᑦ ᑕᒪᒃᑯᓄᖓ ᐊᓈᓇᖏᑦ ᐃᒥᐊᓗᖃᑦᑕᖅᑐᒥᓂᕐᓄᑦ ᓇᔾᔨᐊᖑᑎᓪᓗᒋᑦ ᓈᒻᒪᑦᓯᐊᓐᖏᒍᑎᓖᑦ, ᐃᓗᐊᓂ ᑕᒪᑦᓱᒪ ᐱᕋᔭᑦᑐᒥᓂᕐᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᓱᖅᑕᐅᓯᒪᔪᓂ, ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ.

2.3 ᐃᑲᔪᖅᑕᐅᖁᓪᓗᒋᑦ ᐊᑐᖅᑕᐅᓯᑲᓪᓚᒍᓐᓇᖅᑐᓂᒃ ᑲᑉᐱᐊᓇᖅᑐᑰᕐᓂᐅᔪᑦ ᖃᐅᔨᔭᐅᔪᓂᒃ ᓱᕈᓯᐅᑎᓪᓗᒋᑦ, ᑲᓇᑕ ᑲᒪᖃᑎᖃᓚᖓᕗᑦ−ᐱᕙᓪᓕᐊᑎᑦᓯᓂᕐᒥᒃ ᐃᓄᓐᓄᑦ−ᑐᕌᖓᔪᓂᒃ, ᐊᑯᓂ−ᐊᑐᖅᑎᑕᐅᓚᖓᔪᓂᒃ ᐊᔾᔨᖃᖅᑐᒥᒃ ᑕᒃᑯᓂᖓ ᔪᐊᑕᓐ ᑐᓐᖓᕕᒋᔭᐅᑎᑕᓄᑦ ᑕᒪᒃᑯᓂᖓ ᑕᐅᑐᑦᑕᖃᕋᓱᐊᖅᑐᓂᒃ ᐃᓚᒍᑦᓯᐅᔾᔨᓯᒪᓚᖓᕗᖅ ᓴᐳᔾᔨᓯᒪᒐᓱᐊᕈᑎᓂᒃ ᑕᒪᒃᑯᓂᖓ ᐊᕙᓗᑦᓯᓯᒪᔪᓂᒃ ᐱᔨᑦᓯᕋᐅᑎᓂᒃ ᑕᒪᒃᑯᓂᐊ ᐋᖅᑭᓱᖅᑕᐅᓯᒪᓪᓗᑎᒃ ᐊᑐᖅᑕᐅᑎᑦᓯᑦᑕᐃᓕᔪᑦ ᐊᑦᓱᕈᓐᓇᖅᑐᒃᑰᓂᐅᔪᓂᒃ ᐅᕝᕙᓘᓐᓃᑦ ᓴᐳᔾᔭᐅᓯᒪᓂᖏᓐᓂᒃ ᒪᒥᓴᐅᑎᑦ ᐊᒻᒪᓗ ᖃᓄᐃᓗᐊᑦᑕᐃᓕᒪᓂᕐᒧᑦ ᐱᒍᓐᓇᕐᓂᐅᔪᓂᒃ ᑕᒪᒃᑯᓄᖓ ᓱᕈᓯᕐᓄᑦ ᑕᒪᒃᑯᓄᖓ ᖃᐅᔨᓯᒪᔪᓄᑦ ᐊᑦᓱᕈᓐᓇᖅᑐᓕᓐᓂᒃ.

2.4 ᐱᕙᓪᓕᐊᑎᑦᓯᓗᑕ ᐃᓄᓐᓄᑦ−ᓯᕗᓕᖅᑕᓂᒃ ᑲᒪᑎᑦᓯᒐᓱᐊᕈᑎᓂᒃ ᑕᐃᒫᒃ ᐃᑲᔪᖅᑕᐅᖁᓪᓗᒋᑦ ᓱᔭᐅᓕᖁᓇᒋᑦ ᐃᓄᐃᑦ ᐊᕐᓇᖏᑦ, ᓂᕕᐊᖅᐊᖏᑦ, ᒪᕐᕉᓐᓂᒃ, ᑕᕐᓂᓖᑦ, ᐊᕐᓇᐅᔭᐃᑦ, ᐊᖑᑎᐅᔭᐃᑦ, ᓇᓕᐊᓐᓄᕋᖅᑐᑦ, ᐊᕐᓇᐅᖔᕈᒪᔪᑦ ᐊᖑᑎᐅᖔᕈᒪᔪᑦ, ᐊᔾᔨᒋᔭᐅᓐᖏᑦᑐᑦ, ᑕᒪᒃᑮᑦᓯᔪᑦ ᐊᕐᓇᐅᓂᕐᒧᑦ ᐊᖑᑎᐅᓂᕐᒧᓪᓘᖓᔾᔪᑎᓖᑦ ᑎᒥᖏᑦ, ᐊᓯᖏᓪᓗ ᐃᓄᐃᑦ ᐊᒻᒪᓗ ᐊᓯᖏᓐᓂᒃ ᐱᓂᕐᓗᑦᑕᐅᑐᐃᓐᓇᕆᐊᓖᓐᓂᒃ ᐃᓄᓐᓂᒃ ᑕᒪᒃᑯᐊ ᓄᓕᐊᖅᑕᐅᑎᑕᐅᒐᓱᐊᕋᔭᕐᓂᖏᓐᓄᑦ, ᑲᒪᖃᑎᖃᕐᓗᑕ ᑕᒪᒃᑯᓂᖓ ᐃᓄᓐᓂᒃ ᐊᒻᒪᓗ ᐳᕌᕙᓐᓯᓂᒃ ᐊᒻᒪᓗ ᐊᕕᑦᑐᖅᓯᒪᔪᓂᓪᓗ.

2.5 ᑲᓇᑕ ᐃᖅᑲᓇᐃᔭᖃᑎᖃᓚᖓᕗᖅ ᑕᒪᒃᑯᓂᖓ ᐃᓄᓐᓂᒃ ᐊᒻᒪᓗ ᐊᓯᖏᓐᓂᒃ ᐃᖅᑲᖅᑐᐃᕕᓕᕆᓂᕐᒧᑦ ᑎᒍᒥᐊᖅᑎᐅᔪᓂᒃ ᑕᐃᒫᒃ ᐱᐅᓯᕚᓪᓕᖁᓪᓗᒋᑦ ᐃᓄᓐᓄᑦ−ᑐᕌᖓᔪᑦ ᑭᓪᓕᓯᓂᐊᕐᓂᕐᒧᑦ ᓄᐊᑕᐅᓯᒪᔪᑦ, ᑕᐃᒫᒃ ᐃᓚᒋᔭᐅᓪᓗᓂ ᓴᖅᑭᖅᑎᑕᐅᒐᓱᐊᕈᒪᔪᖅ ᐅᓇᐅᓪᓗᓂ ᐃᑲᔪᖅᑕᐅᖁᓪᓗᒋᑦ ᖃᐅᔨᒐᓱᐊᕐᓂᕐᒨᖓᔪᑦ ᐃᓄᓐᓂᒃ ᑲᒪᒋᔭᐅᖃᑦᑕᖅᑐᓂᒃ ᑕᒪᒃᑯᓄᖓ ᐃᖅᑲᖅᑐᐃᑯᓕᕆᓂᕐᒧᑦ ᐋᖅᑭᓱᖅᑕᐅᓯᒪᔪᓄᑦ, ᐃᓚᒋᔭᐅᓪᓗᑎᒃ ᑕᒪᒃᑮᒃ ᐸᓯᔭᐅᓯᒪᔪᑦ ᐊᒻᒪᓗ ᐱᓂᕐᓗᑦᑕᐅᓯᒪᔪᓪᓗ.

2.6 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ ᑕᐃᒫᒃ ᐱᕙᓪᓕᐊᑎᑦᓯᔪᖃᕐᓗᓂ ᖃᐅᔨᒐᓱᐊᕈᑎᓂᒃ ᐊᒻᒪᓗ ᖃᐅᔨᒐᓱᐊᕐᓂᕐᒧᑦ ᑲᒪᒋᔭᐅᒋᐊᖃᓲᓂᒃ ᐊᒻᒪᓗ ᑐᑭᒧᐊᑦᑎᑦᓯᒍᑎᓂᒃ ᑕᐃᒫᒃ ᐃᑉᐱᒋᔭᐅᑦᓯᐊᕋᓱᐊᖁᓪᓗᒋᑦ ᐃᓄᐃᑦ ᐱᕕᖃᖅᑎᑕᐅᒍᓐᓇᕐᓂᖏᑦ ᑕᒪᒃᑯᓄᖓ ᖃᐅᔨᒐᓱᐊᕐᓂᕐᒧᑦ ᐱᔨᑦᓯᕋᐅᑎᓄᑦ ᑕᒪᒃᑯᓄᖓᖓᔪᑦ ᐃᓱᒪᓕᕆᓂᕐᒧᑦ ᐊᓐᓂᐊᖃᕐᓇᖏᑦᑐᓕᕆᔾᔪᑎᓄᑦ ᐊᒻᒪᓗ ᐃᓗᓯᖅᓱᓯᐊᓐᖏᑦᑐᓕᓐᓄᓪᓗ, ᐃᓚᒋᔭᐅᓪᓗᑎᒃ ᐊᓈᓇᖏᑦ ᐃᒥᐊᓗᖃᑦᑕᖅᑐᒥᓂᕐᓄᑦ ᓇᔾᔨᐊᖑᑎᓪᓗᒋᑦ.

3. ᐱᐅᓯᕚᓪᓕᑎᑦᓯᒐᓱᐊᕐᓂᖅ ᐱᕕᖃᖅᑎᑕᐅᒍᓐᓇᕐᓃᑦ ᑕᒪᒃᑯᓄᖓ ᐃᖅᑲᖅᑐᐃᕕᓕᕆᔾᔪᑎᓄᑦ

ᑖᒃᑯᐊ ᒪᓕᑦᑐᑦ ᐊᕕᑦᑐᖅᓯᒪᔪᑦ ᒥᑦᓵᓄᑦ ᐱᐅᓯᕚᓪᓕᖅᑎᑕᐅᓂᖏᓐᓄᑦ ᐱᕕᖃᑦᑎᑕᐅᒍᓐᓇᕐᓃᑦ ᑕᒪᒃᑯᓄᖓ ᐃᖅᑲᖅᑐᐃᕕᓕᕆᔾᔪᑎᓄᑦ ᑕᐅᑐᑦᑕᖃᕋᓱᐊᖅᑯᑦ ᒥᑦᓵᓄᑦ ᑲᒪᒋᔭᐅᓪᓚᕆᒋᐊᖃᓕᓲᓂᒃ ᐊᒻᒪᓗ ᑲᒪᒐᓱᐊᕐᓂᕐᒧᑦ ᓵᓐᖓᑦᓯᔪᓂᒃ ᐊᖅᑭᓱᖅᑕᐅᓯᒪᔪᓄᑦ ᐊᕝᕕᐊᕈᑎᐅᕙᑦᑐᓄᑦ ᑕᒪᒃᑯᓄᖓ ᐃᓄᓐᓄᑦ ᐃᓗᐊᓂ ᑲᓇᑕᒥᐅᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᓱᖅᑕᐅᓯᒪᔪᓂ. ᑲᒪᑎᒐᓱᐊᕈᑏᑦ ᐱᒐᓱᐊᖅᑯᑦ ᑕᒪᒃᑯᓂᖓ ᐱᐅᓯᕚᓪᓕᖅᑎᑕᐅᓂᖏᓐᓂᒃ ᐱᕕᖃᖅᑎᑕᐅᒍᓐᓇᕐᓂᓃᑦ ᑕᒪᒃᑯᓄᖓ ᑲᓇᑕᒥᐅᑦ ᐃᖅᑲᖅᑐᐃᕕᓕᕆᓂᕐᒧᑦ ᐊᖅᑭᓱᖅᓯᒪᔭᖏᓐᓄᑦ, ᐃᓚᒋᔭᐅᓪᓗᓂ ᐃᒪᐃᑦᑐᖃᕐᓗᓂ ᓴᖅᑭᑎᑦᓯᓗᑎᒃ ᓴᐳᔾᔭᐅᓯᒪᒍᑎᓂᒃ ᑕᒪᑯᓄᖓ ᐱᒋᐊᖃᖅᑐᓄᑦ ᐃᑲᔪᖅᑕᐅᓂᕐᒥᒃ ᓇᐅᒃᑰᕋᓱᐊᕐᕕᒋᔭᐅᑎᓪᓗᒋᑦ ᑖᒃᑯᐊ.

3.1 ᐱᐅᓯᕚᓪᓕᖅᑎᑕᐅᓂᖏᑦ ᐱᕕᖃᖅᑎᑕᐅᒍᓐᓇᕐᓃᑦ ᑕᒪᒃᑯᓄᖓ ᐃᖅᑲᖅᑐᐃᕕᓕᕆᔾᔪᑎᓄᑦ ᑕᒪᒃᑯᓄᖓ ᐃᓄᓐᓄᑦ ᑲᒪᒋᔭᖃᖅᑐᓄᑦ ᑕᒪᒃᑯᓂᖓ ᐱᕋᔭᑦᑐᒥᓂᕐᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐊᖅᑭᓱᖅᑕᐅᓯᒪᔪᓂᒃ ᐊᒻᒪᓗ ᐱᕕᖃᖅᑎᑕᐅᓂᖏᑦ ᓈᒻᒪᑦᑐᓂᒃ, ᐱᑦᓯᐊᖅᑐᓂᒃ, ᐊᔾᔨᒌᑎᑦᓯᔪᓂᒃ, ᐊᒻᒪᓗ ᐃᓕᖅᑯᓯᕐᓄᑦ ᐊᑦᑐᐊᓂᖃᑦᓯᐊᖅᑐᓂᒃ ᑲᒪᒋᔭᐅᒍᑎᓂᒃ. ᑕᒪᓐᓇ ᐃᓚᒍᑦᓯᐅᔾᔨᒍᓐᓇᖅᑯᖅ ᑲᒪᖃᑎᒋᔭᐅᓂᖏᓐᓂᒃ ᑕᒪᒃᑯᐊ ᐃᓄᐃᑦ ᐊᒻᒪᓗ ᐳᕌᕙᑦᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ ᐃᒪᐃᖁᓪᓗᒋᑦ:

3.2 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᑦᓯᒪᔪᑦ, ᐱᕙᓪᓕᐊᑎᑦᓯᓗᑕ ᐊᒻᒪᓗ ᐊᑐᓕᖅᑎᑦᓯᓗᑕᓗ ᐃᓄᓐᓄᑦ−ᑐᕌᖓᔪᓂᒃ ᐃᓕᖅᑯᓯᕐᓄᑦ ᐊᑦᑐᐊᑦᓯᐊᖅᑐᓂᒃ ᐊᒻᒪᓗ ᑐᑭᓯᒪᒋᐊᒃᑲᓂᕐᓂᕐᒧᑦ ᐃᓕᓐᓂᐊᕈᑎᑦᓴᓂᒃ ᑕᒪᒃᑯᓄᖓ ᐃᖅᑲᖅᑐᐃᕕᓕᕆᓂᕐᒧᑦ ᐃᖅᑲᓇᐃᔭᖅᑎᓄᑦ ᐃᓗᐊᓂ ᐃᓄᐃᑦ ᓄᓇᖏᓐᓂ, (ᐆᑦᑑᑎᒋᓗᒋᑦ, ᒐᕙᒪᒃᑯᓐᓄᑦ ᒪᓕᒐᓕᕆᔩᑦ, ᐃᑲᔪᖅᑏᑦ ᒪᓕᒐᓕᕆᔩᑦ, ᐃᖅᑲᖅᑐᐃᕕᓐᓂ ᐃᖅᑲᓇᐃᔭᖅᑏᑦ, ᐃᖅᑲᖅᑐᐃᔨᕋᓛᑦ, ᐃᖅᑲᖅᑐᐃᔩᑦ ᐊᒻᒪᓗ ᑎᒍᔭᐅᒪᕕᓐᓂ ᐱᔨᑦᓯᕋᕐᓂᕐᒧᑦ ᐃᖅᑲᓇᐃᔭᖅᑏᑦ).

3.3 ᐱᕙᓪᓕᐊᑎᑦᓯᓗᑕ ᐊᒻᒪᓗ ᐊᑐᓕᖅᑎᑕᐅᓗᑎᒃ ᑲᒪᒐᓱᐊᕈᑎᑦ ᑕᒪᒃᑯᓂᖓ ᐊᖏᓪᓕᕚᓪᓕᑎᑦᓯᔪᓂᒃ ᑕᒪᒃᑯᓂᖓ ᐃᖅᑲᓇᐃᔭᖅᑎᑖᖑᒋᐊᓕᓐᓂᒃ ᐊᒻᒪᓗ ᓄᖅᑲᑐᐃᓐᓇᖁᔨᓐᖏᓂᕐᒥᒃ ᑕᒪᒃᑯᓂᖓ ᐃᓄᓐᓂᒃ ᐃᓗᐊᓃᑦᑐᓂᒃ ᐃᖅᑲᖅᑐᐃᕕᓕᕆᓂᕐᒧᑦ−ᐊᑦᑐᐊᔪᓄᑦ ᑲᒪᔨᒻᒪᕆᐅᔪᓂᒃ, ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᐊᒻᒪᓗ ᑲᒪᒋᔭᐅᒋᐊᓕᓐᓄᑦ ᑎᒍᒥᐊᖅᑎᐅᔪᑦ.

3.4 ᒥᑭᓪᓕᑎᖅᑕᐅᓂᖏᑦ ᐊᕝᕕᐊᕈᑎᐅᕙᑦᑐᑦ, ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᑕᐃᒫᒃ ᐱᕕᖃᕐᕕᑦᓴᐅᒍᓐᓇᖁᓪᓗᒋᑦ ᒐᓚᑑ ᐃᑲᔪᖅᑎᑦ ᐱᔨᑦᓯᕋᐅᑎᖏᑦ ᐃᓗᐊᓂ ᐃᓄᐃᑦ ᓄᓇᖏᓐᓂ, ᐃᓚᒋᔭᐅᓪᓗᑎᒃ ᐃᒫᒃ ᐱᕙᓪᓕᐊᑎᑦᓯᓂᖅ ᐊᒻᒪᓗ ᐊᑐᓕᖅᑎᑕᐅᓂᖏᓐᓂᒃ ᑲᒪᒐᓱᐊᕈᑎᑦ ᑕᒪᒃᑯᐊ ᓴᐳᔾᔭᐅᓯᒪᓗᑎᒃ ᐃᖅᑲᓇᐃᔭᖅᑎᑖᕋᓱᐊᕐᓃᑦ, ᐃᓕᓐᓂᐊᑎᑦᓯᒍᑏᑦ ᐊᒻᒪᓗ ᓄᖅᑲᑐᐃᓐᓇᖃᑦᑕᖁᔨᓐᖏᓂᕐᒧᑦ ᑕᒪᒃᑯᓂᖓ ᒐᓚᑑ ᑎᑎᕋᖅᑎᖁᑎᖏᓐᓂᒃ, ᕿᒥᕐᕈᔨᖏᓐᓂᒃ ᐊᒻᒪᓗ ᐃᓕᓐᓂᐊᑎᑦᓯᔨᖏᓐᓂᓪᓗ.

3.5 ᓴᓇᒪᓂᓕᕆᓂᖅ ᐊᒻᒪᓗ ᐊᖏᓪᓕᕆᐊᖅᑕᐅᓂᖏᑦ ᐱᓂᕐᓗᑦᑕᒥᓂᕐᓄᑦ ᓴᐳᔾᔨᓯᒪᒍᑏᑦ, ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕋᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᑕᐃᒫᒃ ᐱᐅᓂᖅᓴᓂᒃ ᐃᑉᐱᒋᔭᐅᒐᓱᐊᕐᓗᑎᒃ ᑕᒪᒃᑯᓂᖓ ᐱᕕᑦᓴᐅᒍᒫᕐᓂᐊᖅᑐᓂᒃ ᑕᒪᒃᑯᓂᖓ ᐃᓕᖅᑯᓯᕆᔭᕐᓄᑦ ᓈᒻᒪᓯᐊᖅᑐᓂᒃ ᐱᔨᑦᓯᕋᐅᑎᓂᒃ ᐊᒻᒪᓗ ᓴᐳᔾᔨᔭᐅᓯᒪᒍᑎᓂᒃ ᑕᒪᒃᑯᓄᖓ ᐃᓄᓐᓄᑦ ᐃᓗᐊᓂ ᓄᓇᓕᐸᐅᔭᐃᑦ ᐅᐸᒐᖏᓐᓂ ᐊᒻᒪᓗ ᐃᓗᐊᓂ ᐃᓄᐃᑦ ᓄᓇᖏᓐᓂ.

4. ᐸᓖᓯᓕᕆᓂᖅ

ᐅᑯᐊ ᒪᓕᑦᑐᑦ ᐊᕕᑦᑐᖅᓯᒪᔪᑦ ᓇᓗᓇᐃᔭᐃᕗᑦ ᑲᒪᒋᔭᐅᒋᐊᓕᓐᓂᒃ ᐊᑦᑐᐊᔪᓂᒃ ᑕᒪᒃᑯᓄᖓ ᐃᑉᐱᔭᐅᒋᐊᖃᕐᓂᖏᓐᓂᒃ ᐸᓖᓯᒃᑯᑦ ᐱᔨᑦᓯᕋᐅᑎᖏᑦ ᑕᒪᒃᑯᐊ ᐃᓕᖅᑯᓯᕆᔭᓄᑦ ᐊᑦᑐᐊᓂᖃᑦᓯᐊᕋᓗᐊᕐᒪᖔᑕ ᐊᒻᒪᓗ ᑭᐅᒍᓐᓇᕐᓗᑎᓪᓗ ᑕᒪᒃᑯᓂᖓ ᐃᓄᐃᑦ ᓄᓇᓕᖏᑕ ᐱᒋᐊᓕᖏᓐᓂᒃ. ᐃᓗᐊᓂ ᓄᓇᕗᑦ, ᓄᓇᑦᓯᐊᕗᑦ ᐊᒻᒪᓗ ᐃᓄᕕᐊᓗᐃᑦ ᓄᓇᑖᕆᓯᒪᔭᖏᓐᓂ ᐊᕕᑦᑐᖅᓯᒪᔪᓂ, ᐸᓖᓯᒃᑯᑦ ᐱᔨᑦᓯᕋᐅᑎᖏᑦ ᑕᒪᒃᑯᐊ ᐃᖏᕐᕋᑎᑕᐅᕗᑦ ᑖᒃᑯᓄᖓ ᑲᓇᑕᒥᐅᑦ ᐸᓖᓯᒃᑯᖏᓐᓄᑦ (RCMP). ᐃᓗᐊᓂ ᓄᓇᕕᒃ, ᑖᒃᑯᐊ ᓄᓇᕕᒃ ᐸᓖᓯᒃᑯᑦ ᐱᔨᑦᓯᕋᐅᑎᖏᓐᓂ ᐃᖏᕐᕋᑎᑦᓯᕗᑦ ᐸᓖᓯᓕᕆᓂᕐᒥᒃ ᑕᒪᒃᑯᓄᖓ ᐊᕕᑦᑐᖅᓯᒪᔪᓄᑦ.

4.1 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᓴᐳᔾᔭᐅᖁᓪᓗᒋᑦ ᐃᓄᓐᓄᑦ−ᓯᕗᓕᖅᑕᐃᑦ ᐊᑦᓱᕈᓗᐊᓯᑲᓪᓚᑦᑐᓄᑦ ᑲᒪᒋᐊᖃᓯᒍᑎᐅᔪᑦ ᐊᖅᑭᓱᖅᑕᐅᒍᑎᖏᓐᓂᒃ ᐱᒐᓱᐊᕈᑎᓕᓐᓂᒃ ᐃᒫᒃ ᐱᑎᑦᓯᓂᕐᒥᒃ ᐅᓗᕆᐊᓇᖅᑐᒦᑦᑐᓂᒃ ᐃᓄᓐᓂᒃ ᑕᒪᒃᑯᓄᖓᖅᑎᑕᐅᓗᑎᒃ ᐱᒋᐊᓕᖏᓐᓄᑦ ᐱᔨᑦᓯᕋᐅᑎᓄᑦ ᐊᒻᒪᓗ ᓴᐳᔾᔭᐅᓯᒪᒍᑎᑦᓴᖏᓐᓄᓪᓗ.

4.2 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᓴᐳᔾᔭᐅᖁᓪᓗᒋᑦ ᐱᕕᖃᖅᑎᑕᐅᒍᓐᓇᕐᓂᖅ ᒪᑯᓄᖓ ᑲᒪᔨᒻᒪᕆᓐᓄᑦ, ᐱᒐᓱᐊᓪᓚᕆᑦᑐᓄᑦ ᐊᒻᒪᓗ ᑭᐅᒍᓐᓇᖅᑐᓂᒃ ᐸᓖᓯᒃᑯᑦ ᐱᔨᑦᓯᕋᐅᑎᖏᓐᓂᒃ ᐃᓗᐊᓂ ᐃᓄᐃᑦ ᓄᓇᖏᑕ. ᑖᒃᑯᐊ ᐃᓚᒍᑦᓯᐅᔾᔨᒍᓐᓇᖅᑯᑦ:

4.3 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᐱᕙᓪᓕᐊᑎᑦᓯᔪᖃᕐᓗᓂ ᐊᒻᒪᓗ ᐊᑐᓕᖅᑎᑕᐅᓗᑎᒃ ᐃᓄᓐᓄᑦ−ᑐᕋᖓᔪᑦ ᐃᓕᖅᑯᓯᕆᔭᓂᒃ ᖃᐅᔨᒪᑦᓯᐊᕈᓐᓇᖁᓪᓗᒋᑦ ᐊᒻᒪᓗ ᖃᐅᔨᒪᔭᐅᒃᑲᖅᑕᐅᕆᐊᕐᓂᖏᑦ ᐃᓕᓐᓂᐊᑎᑦᓯᒍᑏᑦ ᐃᑲᔪᖅᓯᔭᐅᖁᓪᓗᒋᑦ ᓄᖑᑎᑕᐅᓂᖏᑦ ᐊᖅᑭᓱᖅᑕᐅᓯᒪᔪᓅᖓᔪᑦ ᐅᕕᓂᐅᖃᑎᒋᔭᐅᓐᖏᓂᕐᒧᑦ ᐱᓂᕐᓗᑦᑕᐅᒍᑎᐅᕙᑦᑐᑦ ᐃᓗᐊᓂ ᐃᖅᑲᖅᑐᐃᕕᓕᕆᓂᕐᒧᑦ ᐊᖅᑭᓱᖅᑕᐅᓯᒪᔪᓂ, ᐃᓚᒋᔭᐅᓪᓗᓂ ᐃᒫᒃ ᐱᐅᓯᕚᓪᓕᖅᑎᑕᐅᓗᑎᒃ ᐃᓕᓐᓂᐊᑎᑦᓯᒍᑏᑦ ᒪᑯᓂᖓ ᒪᓕᒐᕐᓂᒃ ᒪᓕᑦᑕᐅᑎᑦᓯᒐᓱᐊᖅᑎᓄᑦ.

5. ᑎᒍᔭᐅᒪᓕᕆᓂᖅ

ᑕᒪᒃᑯᐊ ᒪᓕᑦᑐᖅ ᐊᕕᑦᑐᖅᓯᒪᔪᑦ ᐃᓚᒍᑦᓯᐅᔾᔨᕗᑦ ᑲᒪᒐᓱᐊᕈᑎᓂᒃ ᐊᑦᑐᐊᔪᓂᒃ ᑕᒪᒃᑯᓄᖓ ᑎᒍᔭᐅᒪᔪᓄᑦ ᐋᖅᑭᓱᖅᑕᐅᓯᒪᔪᓂᒃ ᐃᒫᒃ ᑕᐅᑐᑦᑕᖃᕋᓱᐊᖅᓱᑎᒃ ᒥᑦᓵᓄᑦ ᐃᓕᖅᑯᓯᕐᓅᖓᔪᓂᒃ ᑐᕌᖓᔪᓂᒃ ᓴᐳᔾᔨᓯᒪᒐᓱᐊᕈᑎᓂᒃ ᑕᒪᒃᑯᓄᖓ ᖃᓄᐃᒍᓐᓃᕋᓱᐊᕈᒪᔪᓄᑦ ᐊᒻᒪᓗ ᒪᒥᓴᖅᑕᐅᓂᖏᑦ ᑕᒪᒃᑯᐊ ᑎᒍᔭᐅᒪᔪᑦ ᐃᓄᐃᑦ ᐊᒻᒪᓗ ᓄᓇᓕᒻᒨᑲᓐᓂᖅᑎᑕᐅᓂᖏᓐᓄᑦ ᓴᐳᔾᔭᐅᓯᒪᒍᑏᑦ ᑕᒪᒃᑯᐊ ᑕᐅᑐᑦᑕᖃᕋᓱᐊᖅᑐᑦ ᒥᑦᓵᓄᑦ ᒥᑭᓪᓕᑎᖅᑕᐅᓂᖏᓐᓂᒃ ᐱᕋᔭᓕᖅᑭᑲᓐᓂᑐᐃᓐᓇᕆᐊᖃᕐᓂᖏᑦ ᐊᒻᒪᓗ ᓱᔪᐅᑲᓪᓚᖁᓇᒋᑦ ᐱᓂᕐᓗᑦᑕᐅᓚᐅᖅᓯᒪᔪᑦ.

5.1 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ ᐱᕙᓪᓕᐊᑎᑦᓯᓗᑕ ᐊᒻᒪᓗ ᐊᑐᓕᖅᑎᑦᓯᓗᑕᓗ ᐃᓕᓂᐊᑎᑦᓯᒍᑎᓂᒃ ᒥᑦᓵᓄᑦ ᐃᓄᐃᑦ ᐃᓕᖅᑯᓯᖏᓐᓄᑦ, ᓯᐊᕈᐊᓗᓂᒃ ᖃᓄᐃᖃᑦᑕᖅᓯᒪᓂᖏᓐᓄᑦ ᐊᒻᒪᓗ ᐃᓅᓯᖏᓐᓅᖓᔪᓂᒃ ᑕᐃᒫᒃ ᐃᑲᔪᖅᓯᔭᐅᖁᓪᓗᒍ ᐱᐅᓯᕚᓪᓕᑎᑦᓯᓂᖅ ᖃᐅᔨᒪᔭᐅᓂᖏᓐᓂᒃ ᐊᒻᒪᓗ ᑐᑭᓯᒪᔭᐅᓂᖏᓐᓂᒃ ᑕᒪᒃᑯᐊ ᐃᓄᐃᑦ ᑕᒪᒃᑯᐊ ᐃᓗᐊᓃᑦᑐᑦ ᒐᕙᒪᑐᖃᒃᑯᑦ ᑎᒍᔭᐅᒪᕕᖏᓐᓂ ᐃᖅᑲᓇᐃᔭᖅᑎᒋᔭᐃᑦ.

5.2 ᐱᕙᓪᓕᐊᑎᑦᓯᖃᑎᒋᓗᒋᑦ ᓂᕈᐊᕋᑦᓴᓂᒃ ᑕᒪᒃᑯᐊ ᐃᓄᐃᑦ ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ ᑕᐃᒫᒃ ᓵᓐᖓᔭᐅᓗᑎᒃ ᐋᖅᑭᓱᖅᑕᐅᓯᒪᔪᑦ ᐱᖁᔭᐃᑦ ᐊᒻᒪᓗ ᐊᑐᕐᓂᖃᖅᑐᓅᖓᔪᓄᑦ ᐊᕝᕕᐊᕈᑎᐅᕙᑦᑐᓂᒃ ᐊᑦᑐᐊᔪᓂᒃ ᑕᒪᒃᑯᓄᖓ ᐃᓗᕕᖅᓯᔪᖃᖅᑐᓄᑦ ᐅᐸᑦᑎᑕᐅᒍᓐᓇᕐᓃᑦ, ᐃᓚᒋᔭᐅᔪᑦ ᐳᓛᕆᐊᖅᑎᑕᐅᓂᖏᑦ, ᐃᓐᓇᑐᖃᐃᑦ ᐳᓛᕆᐊᖅᑎᑕᐅᓂᖏᑦ, ᐃᓄᑦᑎᑐᑦ ᐅᖃᐅᓯᖏᓐᓅᖓᔪᑦ ᐊᒻᒪᓗ ᐱᕕᖃᖅᑎᑕᐅᓂᖅ ᐃᓄᓐᓄᑦ−ᓯᕗᓕᖅᑕᓄᑦ ᑲᒪᑎᑦᓯᒍᑎᓄᑦ ᐃᓗᐊᓂ ᑎᒍᔭᐅᒪᕖᑦ, ᑕᐃᒫᒃ ᐊᑐᓕᖅᑎᑦᓯᔪᖃᕋᓱᐊᕐᓗᓂ ᑕᒪᒃᑯᓂᖓ ᐊᑐᖅᑎᑕᐅᓂᖏᓐᓂᒃ ᐃᑉᐱᒍᓱᒐᓱᐊᖅᑐᑦ ᑕᒪᒃᑯᐊ ᐃᓄᐃᑦ ᐱᕕᖃᕈᓐᓇᖁᓪᓗᒋᑦ ᐊᑦᑐᐊᒍᑎᑎᑕᐅᖏᓐᓇᖁᓪᓗᒋᒃ ᑕᒪᒃᑯᓄᖓ ᐃᓄᐃᑦ ᐃᓕᖅᑯᓯᖏᓐᓄᑦ ᐊᒻᒪᓗ ᐃᓅᓯᖏᓐᓄᓪᓗ ᑎᒍᔭᐅᒪᑎᓪᓗᒋᑦ ᑕᒪᒃᑯᐊ ᑎᒍᔭᐅᒪᓂᕐᒧᑦ ᑲᒪᕕᒻᒪᕆᓐᓃᑦᑐᑦ.

5.3 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ ᑕᐃᒫᒃ ᐊᖏᓪᓕᕙᓪᓕᑎᑦᓯᒐᓱᐊᖅᑎᑦᓯᔪᖃᕐᓗᓂ ᑕᒪᒃᑯᐊ ᐊᑐᖅᑕᐅᓂᖏᓐᓂᒃ ᐃᓄᓐᓄᑦ−ᑐᕌᖓᔪᑦ ᑲᒪᒐᓱᐊᕈᓰᑦ ᑕᒪᒃᑯᓂᖓ ᓴᐳᔾᔨᓯᒪᒍᑏᑦ ᖃᓄᐃᒍᓐᓃᒐᓱᐊᕈᒪᔪᓄᑦ, ᓄᓇᓕᓐᓅᑲᓐᓂᖅᑎᑕᐅᓂᖏᓐᓄᑦ ᐊᒻᒪᓗ ᒪᒥᓴᖅᑕᐅᓂᖏᓐᓄᓪᓗ ᑕᒪᒃᑯᐊ ᐃᓄᐃᑦ ᐱᕋᔭᑦᓯᒪᔪᑦ ᐃᓗᐊᓃᑦᑐᑦ ᑎᒍᔭᐅᒪᓂᕐᒧᑦ ᐋᖅᑭᓱᖅᑕᐅᓯᒪᔪᓂ ᐊᒻᒪᓗ ᐃᓄᐃᑦ ᓅᑎᑕᐅᕙᓪᓕᐊᔪᑦ ᑕᒪᒃᑯᐊ ᑎᒍᔭᐅᒪᕕᒻᒦᖔᖅᑐᑦ. ᑕᒪᓐᓇ ᐃᓚᒍᑦᓯᐅᔾᔨᕗᖅ ᖃᐅᔨᒐᓱᐊᕐᓂᕐᒥᒃ ᖃᓄᖅ ᑕᒪᓐᓇ ᐊᖏᓪᓕᕚᓪᓕᖅᑎᑕᐅᒍᓐᓇᕐᒪᖔᖅ ᐃᓄᐃᑦ ᐱᕕᖃᖅᑎᑕᐅᖃᑦᑕᕐᓂᖏᑦ ᑕᒪᒃᑯᓄᖓ ᐃᓄᓐᓄᑦ−ᑐᕌᖓᔪᓄᑦ ᖃᓄᐃᒍᓐᓃᕋᓱᐊᕐᓂᕐᒧᑦ ᑲᒪᑎᑦᓯᒍᑎᓄᑦ ᐊᒻᒪᓗ ᐱᔨᑦᓯᕋᐅᑎᓄᓪᓗ ᑕᒪᒃᑯᓄᖓ ᐅᖃᐅᓯᓕᓐᓄᑦ ᑕᒪᒃᑯᐊ ᑐᑭᓯᓲᖏᓐᓂᒃ, ᐃᓚᒋᔭᐅᓪᓗᓂ ᐃᓄᓐᓅᖓᔪᓂᒃ ᐊᔾᔨᖃᖅᑐᓂᒃ ᒪᒥᓴᕐᓂᕐᒧᑦ ᑐᔪᕐᒥᕕᓐᓄᑦ.

5.4 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ ᒥᑦᓵᓄᑦ ᑐᑭᓯᒍᑎᐅᔪᑦ ᖃᐅᔨᒪᔭᐅᒃᑲᖅᑕᐅᓂᖏᑦ ᒥᑦᓵᓅᖓᔪᑦ ᐃᓄᐃᑦ ᑕᒪᒃᑯᐊ ᑎᒍᔭᐅᒪᔪᑦ ᐅᕝᕙᓘᓐᓃᑦ ᒪᓕᑦᑕᐅᓪᓚᕆᒋᐊᓕᓐᓂᒃ ᐊᓂᑎᑕᐅᓂᕐᒧᑦ ᑕᐃᒫᒃ ᐃᑲᔪᖅᑕᐅᖁᓪᓗᒋᑦ ᐱᑎᑕᐅᓂᖏᓐᓂᒃ ᑕᒪᒃᑯᓂᖓ ᑲᔪᓯᓯᒪᐃᓐᓇᖅᑐᓄᑦ ᑕᒪᒃᑯᓄᖓ ᖃᓄᐃᒍᓐᓃᕋᓱᐊᕐᓂᕐᒧᑦ ᑲᒪᑎᑦᓯᒍᑎᓄᑦ ᐊᒻᒪᓗ ᐱᔨᑦᓯᕋᐅᑎᓄᓪᓗ ᑕᐃᒫᒃ ᒥᑭᓪᓕᕙᓪᓕᖅᑎᑕᐅᖁᓪᓗᒍ ᐱᕋᔭᒃᑲᓐᓂᕈᓐᓇᕐᓂᖏᑦ.

5.5 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ ᑕᐃᒫᒃ ᓴᐳᔭᐅᒐᓱᐊᕐᓗᑎᒃ ᐊᕕᑦᑐᖅᓯᒪᔪᓃᑦᑐᑦ 81ᒥ ᑕᐃᑲᓂ ᑎᒍᔭᐅᒪᔪᓕᕆᓂᕐᒧᑦ ᐊᒻᒪᓗ ᖃᓄᐃᓕᖓᒋᐊᖃᖅᑐᓄᑦ ᐊᓂᑎᑕᐅᓯᒪᔪᓂᒃ ᒪᓕᒐᖅ ᑕᒪᒃᑯᓄᖓ ᑎᒍᔭᐅᓚᕕᓐᓄᑦ ᐱᔨᑦᓯᕋᐅᑎᓂ ᐊᒻᒪᓗ ᐅᐸᒐᐅᔪᓂ ᑕᒪᒃᑯᓄᖓ ᑐᓐᖓᕕᖃᖅᑐᓄᑦ ᒥᑦᓵᓅᖓᔪᓂᒃ ᐃᓄᐃᑦ ᐊᑐᕐᓂᖃᑦᓯᐊᖅᑐᖁᑎᖏᓐᓄᑦ ᐊᒻᒪᓗ ᑲᒪᒋᓲᖏᓐᓄᓪᓗ ᒪᒥᓴᕐᓂᕐᒨᖓᔪᓄᑦ ᐊᒻᒪᓗ ᐅᑎᖅᑎᑕᐅᓂᖏᓐᓄᑦ ᑕᒪᒃᑯᓄᖓ ᓄᓇᓕᓐᓄᑦ, ᐱᓗᐊᓐᖑᐊᖅᑐᒥᒃ ᐊᑐᖅᑕᐅᑎᓪᓗᒋᑦ ᓄᓇᒨ−ᓅᖃᑦᑕᑎᑦᓯᒍᑏᑦ ᑲᒪᑎᑦᓯᒍᑎᐅᔪᑦ ᐃᓗᐊᓂ ᐃᓄᐃᑦ ᓄᓇᖏᑕ.

5.6 ᓴᐳᔾᔭᐅᓯᒪᓂᖏᑦ ᓄᓇᓕᒻᒧᑦ ᐅᑎᖅᑎᑕᐅᓂᕐᒧᑦ ᐸᕐᓇᐅᑎᑦ ᓇᑦᓯᐅᔾᔭᐅᔪᑦ ᓱᕗᒧᐊᑦᑎᑕᐅᓪᓗᑎᒃ ᑕᒪᒃᑯᓄᖓ ᐃᓄᐃᑦ ᓄᓇᓕᖏᓐᓄᑦ ᐊᑖᓃᑦᑐᓄᑦ ᐊᕕᑦᑐᖅᓯᒪᔪᓂ 84ᒥ ᑖᒃᑯᓇᓂ ᑎᒍᔭᐅᒪᔪᓕᕆᓂᕐᒧᑦ ᐊᒻᒪᓗ ᖃᓄᐃᓕᖓᒋᐊᖃᖅᑐᓄᑦ ᐊᓂᑎᑕᐅᓯᒪᔪᓂᒃ ᒪᓕᒐᖅ, ᐃᓚᒋᔭᐅᓪᓗᑎᒃ ᓴᐳᔾᔨᓯᒪᒍᑏᑦ ᑕᒪᒃᑯᓂᖓ ᖃᓄᐃᓕᖓᒋᐊᖃᖅᑐᓄᑦ ᐊᓂᑎᑕᐅᓯᒪᔪᓄᑦ, ᓅᑉᐸᓪᓕᐊᔪᓄᑦ ᐃᓪᓗᐃᑦ ᐊᒻᒪᓗ ᐊᓯᖏᑦ ᐱᒋᐊᖃᖅᑕᖏᑦ ᑕᒪᒃᑯᐊ ᐱᕋᔭᑦᓯᒪᔪᑦ, ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ.

6. ᐃᓄᓐᓄᑦ−ᓯᕗᓕᖅᑕᐅᔪᑦ ᐃᖅᑲᖅᑐᐃᕕᓕᕐᓂᕐᒧᑦ ᑲᒪᒋᐊᖃᓪᓚᕆᓕᕈᑏᑦ

ᐅᓇ ᐊᕕᑦᑐᖅᓯᒪᔪᖅ ᐱᒐᓱᐊᖅᑯᖅ ᑕᒪᒃᑯᓂᖓ ᓴᐳᔾᔨᒍᑎᓂᒃ ᐃᓄᓐᓄᑦ−ᓯᕗᓕᖅᑕᓂᒃ ᑲᒪᒋᐊᖃᓪᓚᕆᓕᕐᓂᕐᒧᑦ ᐃᓗᐊᓂ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᓱᖅᑕᐅᓯᒪᔪᓂ ᐃᓚᒋᔭᐅᓪᓗᑎᒃ ᐃᖅᑲᓇᐃᔮᕆᔭᐅᓂᖏᑦ ᒥᑦᓵᓄᑦ ᐱᒻᒪᕆᕈᒃᑲᓂᖅᑎᑕᐅᓂᖏᑦ ᑕᒪᒃᑯᐊ ᐃᓄᐃᑦ ᒪᓕᒐᓕᕆᒍᑎᖏᑦ ᐊᒻᒪᓗ ᐃᖅᑲᖅᑐᐃᕕᓕᕆᓂᕐᒧᑦ ᐃᓱᒪᒋᓲᖏᓐᓂᒃ, ᐃᓄᐃᑦ ᐊᓯᐊᒎᒃᑲᓐᓂᑎᑦᓯᒐᓱᐊᕈᑎᖏᓐᓂᒃ ᐊᒻᒪᓗ ᐅᑎᖅᑎᑕᐅᓂᖏᑦ ᐃᖅᑲᖅᑐᐃᕕᓕᕆᓂᕐᒧᑦ ᑲᒪᑎᑦᓯᒍᑏᑦ, ᐊᒻᒪᓗ ᓄᓇᒧᑦ ᓅᑎᑦᓯᖃᑦᑕᓂᕐᒧᑦ ᑲᒪᑎᑦᓯᒍᑏᑦ.

6.1 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᓴᐳᔾᔭᐅᖁᓪᓗᒍ ᑕᒪᓐᓇ ᐱᒻᒪᕆᕈᖅᑎᑕᐅᒃᑲᓂᕐᓂᖏᑦ ᑕᒪᒃᑯᐊ ᐃᓄᐃᑦ ᒪᓕᒐᓕᕆᔾᔪᑎᖏᑦ ᐊᒻᒪᓗ ᐃᖅᑲᖅᑐᐃᕕᓕᕆᓂᕐᒧᑦ ᐃᓱᒪᒋᓲᖏᓐᓂᒃ. ᑖᒃᑯᐊ ᐃᓚᒍᓯᐅᔾᔨᒍᓐᓇᖅᑯᖅ ᓴᐳᔾᔭᐅᓯᒪᓂᖏᓐᓂ ᐃᓄᐃᑦ ᐊᖏᖃᑎᒌᓐᓂᕐᒧᑦ ᑎᒥᖁᑎᖏᓐᓂᒃ ᑕᐃᒫᒃ ᑲᒪᔪᖃᖅᑎᓪᓗᒍ ᖃᐅᔨᒐᓱᐊᕈᑎᓂᒃ ᐊᒻᒪᓗ ᓄᓇᓕᓐᓂᒃ ᑲᒪᖃᑎᖃᕐᓂᐅᔪᓄᑦ ᐊᑦᑐᐊᔪᓂᒃ ᒪᑯᓄᖓ ᐃᓄᐃᑦ ᒪᓕᒐᖏᓐᓄᑦ ᐊᒻᒪᓗ ᒪᓕᒐᓕᕆᓂᕐᒧᑦ ᑲᒪᒐᓱᐊᕈᓯᖏᓐᓄᑦ.

6.2 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ ᑕᐃᒫᒃ ᓴᐳᔾᔭᐅᓗᑎᒃ ᑕᒪᒃᑯᐊ ᐱᕙᓪᓕᐊᔪᓕᕆᔪᑦ ᐊᒻᒪᓗ ᐊᖏᓪᓕᕚᓪᓕᖅᑎᑕᐅᓗᑎᒃ ᑕᒪᒃᑯᐊ ᐃᓄᓐᓄᑦ−ᑐᕌᖓᔪᑦ ᐊᓯᐊᒎᒃᑲᓐᓂᕋᓱᐊᕈᑏᑦ ᐊᒻᒪᓗ ᐅᑎᖅᑎᑕᐅᓂᖏᑦ ᐃᖅᑲᖅᑐᐃᕕᓕᕆᓂᕐᒧᑦ ᑲᒪᑎᑦᓯᒍᑏᑦ.

6.3 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ ᓴᐳᔾᔭᐅᓗᑎᒃ ᐊᒻᒪᓗ ᐊᖏᓪᓕᕚᓪᓕᖅᑎᑕᐅᓗᑎᒃ ᐃᓄᓐᓄᑦ−ᑐᕌᖓᔪᑦ ᑲᒪᑎᑦᓯᒍᑏᑦ, ᐃᓚᒍᑦᓯᐅᔾᔭᐅᓯᒪᔪᑦ ᑕᒪᒃᑯᓄᖓ ᐱᕋᔭᑦᑐᒥᓂᕐᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᓱᖅᑕᐅᓯᒪᔪᓄᑦ, ᒪᑯᓄᖓ ᐱᕋᔭᓂᕐᒥᒃ ᓱᔪᖃᑦᑕᐃᓕᑎᑦᓯᒐᓱᐊᕈᑎᓄᑦ, ᖃᓄᐃᒍᓐᓃᕋᓱᐊᕈᑎᓄᑦ ᐊᒻᒪᓗ ᒪᒥᓴᕐᓂᒧᓪᓗ.

6.4 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᑕᐃᒫᒃ ᐱᕕᖃᖅᑎᑕᐅᖁᓪᓗᒋᑦ ᓴᐳᔾᔨᓯᒪᒍᑎᓄᑦ ᑕᒪᒃᑯᓄᖓ ᐃᓄᓐᓄᑦ−ᓯᕗᓕᖅᑕᓄᑦ ᓄᓇᓕᓐᓂ ᐃᖅᑲᖅᑐᐃᕕᓕᕆᓂᕐᒧᑦ ᐅᐸᒐᐅᔪᓂ ᑕᐃᒫᒃ ᐱᑎᑦᓯᒍᓐᓇᖁᓪᓗᒋᑦ ᐱᔨᑦᓯᕋᐅᑎᓂᒃ ᑕᒪᒃᑯᓄᖓ ᐃᓄᓐᓄᑦ ᑲᒪᒋᔭᓄᑦ ᑕᒪᒃᑯᓄᖓ ᐃᖅᑲᖅᑐᐃᕕᓕᕆᓂᕐᒧᑦ ᐊᖅᑭᓱᖅᑕᐅᓯᒪᔪᓄᑦ, ᒪᑯᐊᖑᖃᑕᐅᔪᑦ:

7. ᓴᐳᔾᔭᐅᓂᖏᑦ ᐃᓄᐃᑦ ᓇᒻᒥᓂᖅ−ᐃᓱᒪᖅᓱᕈᓐᓇᕐᓂᖏᑦ ᐊᒻᒪᓗ ᑲᒪᕕᒋᒍᓐᓇᖅᑕᖏᑦ ᓄᓇᖏᓐᓂ

ᐅᑯᐊ ᐊᕕᖅᑐᖅᓯᒪᔪᑦ ᓵᓐᖓᑦᓯᕗᑦ ᐃᓄᐃᑦ ᓇᒻᒥᓂᖅ−ᐃᓱᒪᖅᓱᕈᓐᓇᕐᓂᖏᓐᓂᒃ ᐊᒻᒪᓗ ᑕᒪᑦᓱᒪᓐᖓᑦ ᐃᓕᓴᕆᔭᐅᓂᖏᓐᓂᒃ ᑕᒪᒃᑯᐊ ᑲᒪᕕᒋᒍᓐᓇᖅᑕᖏᑦ ᓄᓇᖏᓐᓂ ᑕᒪᒃᑯᓂᖓ ᐊᐅᓚᑕᐅᒋᐊᓕᓐᓂᒃ ᐃᖅᑲᖅᑐᐃᕕᓕᕆᓂᐅᔪᓂᒃ, ᑖᒃᑯᓂᖓ ᐊᑐᓕᖅᑎᑕᐅᓂᖏᓐᓂᒃ ᑖᒃᑯᐊ ᐃᖅᑲᖅᑐᐃᕕᓕᕆᓂᕐᒧᑦ−ᐊᑦᑐᐊᔪᓄᑦ ᐱᒋᐊᖃᖁᔭᐅᔪᑦ ᐊᑖᓃᑦᑐᑦ ᐃᓄᐃᑦ ᐅᓪᓗᒥᐅᓕᖅᑐᖅ ᐊᖏᖃᑎᒌᒍᑎᖏᓐᓂ, ᐊᒻᒪᓗ ᐊᑐᖅᑕᐅᓂᖏᓐᓄᑦ ᑕᒪᒃᑯᐊ ICPC ᑕᐃᒫᒃ ᓯᕗᒧᐊᑦᑎᑕᐅᖁᓪᓗᒋᑦ ᐃᓄᐃᑦ ᐱᒻᒪᕆᐅᓂᖅᐹᕆᔭᖏᑦ ᐃᓗᐊᓂ ᑖᒃᑯᐊ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᑦ.

7.1 ᑲᒪᖃᑎᒋᓗᒋᑦ ᑕᒪᒃᑯᐊ ᐃᓄᐃᑦ ᐊᖏᖃᑎᒌᓐᓂᕐᒧᑦ ᑎᒥᖁᑎᐅᔪᑦ, ᐊᒻᒪᓗ ᐳᕌᕙᓐᓰᑦ ᐊᒻᒪᓗ ᐊᕕᑦᑐᖅᓯᒪᔪᑦ, ᑕᐃᒫᒃ ᓴᐳᔾᔭᐅᖁᓪᓗᒋᑦ ᐃᓄᐃᑦ ᓇᒻᒥᓂᖅ−ᐃᓱᒪᖅᓱᕈᓐᓇᕐᓂᖏᑦ ᐃᓗᐊᓂ ᐊᑦᑐᐊᔪᓄᑦ ᑕᒪᒃᑯᓄᖓ ᐊᐅᓚᑕᐅᓂᖏᓐᓄᑦ ᐃᖅᑲᖅᑐᐃᕕᓕᕆᔾᔪᑏᑦ. ᑕᒪᓐᓇ ᐃᓚᒍᑦᓯᐅᔾᔨᒍᓐᓇᖅᑯᖅ ᐅᖃᖃᑎᒌᓐᓂᕐᒥᒃ ᐊᒻᒪᓗ ᑲᒪᖃᑎᒌᑦᓯᐊᓂᕐᒥᓪᓗ ᒥᑦᓵᓄᑦ ᐊᑐᖅᑎᑕᐅᑐᐃᓐᓇᕆᐊᖃᕐᓂᖏᓐᓂᒃ ᒪᓕᒐᕐᓅᖓᔪᑦ ᓂᕈᐊᕋᑦᓴᐃᑦ ᑕᐃᒫᒃ ᐃᓕᓴᕆᔭᐅᖁᓪᓗᒋᑦ ᐊᒻᒪᓗ ᐱᒍᓐᓇᖁᓪᓗᒋᑦ ᐃᓄᐃᑦ ᑲᒪᒋᒍᓐᓇᖅᑕᖏᑦ ᓄᓇᒥᓐᓂ ᐊᑦᑐᐊᔪᓂᒃ ᑕᒪᒃᑯᓄᖓ ᐊᐅᓚᑕᐅᓂᖏᓐᓄᑦ ᑕᒪᒃᑯᐊ ᐃᖅᑲᖅᑐᐃᕕᓕᕆᓂᕐᒨᖓᔪᑦ.

7.2 ᑲᓇᑕ ᑲᔪᓯᑎᑦᓯᓯᒪᓚᖓᕗᖅ ᑲᒪᖃᑎᖃᕐᓂᕐᒥᒃ ᑕᒪᒃᑯᓂᖓ ᐃᓄᐃᑦ ᐊᖏᖃᑎᒌᓐᓂᕐᒧᑦ ᑎᒥᖁᑎᖏᓐᓂᒃ ᑕᐃᒫᒃ ᐊᑐᓕᖅᑎᑦᓯᖁᓪᓗᒋᑦ ᐃᖅᑲᖅᑐᐃᕕᓕᕆᓂᕐᒧᑦ−ᐊᑦᑐᐊᔪᓂᒃ ᐃᓄᓐᓄᑦ ᐅᓪᓗᒥᐅᓕᖅᑐᖅ ᐊᖏᖃᑎᒌᓐᓂᕐᒧᑦ ᐱᒋᐊᖃᖁᔭᐅᔪᓂᒃ.

7.3 ᑲᓇᑕ ᐊᒻᒪᓗ ᐃᓄᐃᑦ ᐊᑐᖅᑎᑦᓯᓚᖓᕗᑦ ᐆᒥᖓ ICPC ᑕᐃᒫᒃ ᑲᒪᑎᑦᓯᒍᑎᐅᓗᓂ ᑕᒪᑐᒥᖓ ᐊᑐᓕᖅᑎᑕᐅᓂᖏᓐᓂᒃ, ᑐᓴᖅᑎᑦᓯᒍᑎᐅᓂᖏᓐᓄᑦ ᒪᑯᐊ, ᖃᐅᔨᓴᖅᑕᐅᓂᖏᓐᓄᑦ ᐊᒻᒪᓗ ᖃᐅᔨᒐᓱᐊᖅᑕᐅᓂᖏᓐᓄᓪᓗ ᐃᓄᓐᓄᑦ−ᑐᕌᖓᔪᑦ ᓄᓇᖃᖅᑲᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᑐᓄᑦ ᑲᔪᓯᑎᑕᐅᒐᓱᐊᕐᓂᖏᑦ.