ᑐᓐᖓᕕᒋᔭᐅᔪᑦ ᐊᒻᒪᓗ ᑐᕌᒐᕆᔭᐅᔪᑦ
- ᓇᒻᒥᓂᖅ−ᐃᓱᒪᖅᓱᕈᓐᓇᕐᓂᖅ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐱᒐᓱᐊᖅᑯᖅ ᓴᐳᔾᔨᓯᒪᒐᓱᐊᕐᓂᕐᒥᒃ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᐃᑦ ᐃᓄᖏᓐᓂᒃ ᐊᑐᖅᑎᑦᓯᖁᓪᓗᒋᑦ ᐊᒻᒪᓗ ᐊᑕᖏᖅᑐᒥᒃ ᖁᕕᐊᓇᖅᑐᒃᑰᕈᓐᓇᕐᓗᑎᒃ ᐱᒍᓐᓇᐅᑎᒥᓐᓂᒃ ᓇᒻᒥᓂᖅ−ᐃᓱᒪᖅᓱᕈᓐᓇᓂᕐᒥᒃ ᐊᒻᒪᓗ ᓇᒻᒥᓂᖅ−ᒐᕙᒪᖃᕐᓗᑎᒃ, ᐃᓚᒋᔭᐅᓪᓗᑎᒃ ᐱᕕᖃᖅᑎᑕᐅᓂᖏᑦ ᐊᒻᒪᓗ ᐱᒋᐊᒃᑲᓂᖅᑎᑕᐅᓗᑎᒃ ᑲᒪᖃᑕᐅᓂᖏᑦ ᐱᕙᓪᓕᐊᑎᑦᓯᔪᓄᑦ, ᒪᑭᒪᑎᑦᓯᔪᓄᑦ ᐊᒻᒪᓗ ᐊᑐᓕᖅᑎᑦᓯᓂᕐᒧᓪᓗ ᓇᒻᒥᓂᕆᔭᒥᓐᓂᒃ ᐊᐅᓚᒍᓐᓇᖅᑕᖏᓐᓂᒃ, ᒪᓕᒐᕐᓂᒃ, ᐊᐅᓚᑦᓯᔨᐅᓂᕐᒧᑦ ᑎᒥᖁᑎᐅᔪᑦ, ᑲᒪᑎᑦᓯᒍᑎᐅᔪᓄᑦ ᐊᒻᒪᓗ ᐱᔨᑦᓯᕋᐅᑎᓄᓪᓗ ᐃᓗᐊᓃᑦᑐᓂᒃ ᐃᖅᑲᖅᑐᐃᕕᓕᕆᓂᐅᑉ ᐊᒻᒪᓗ ᑭᓇᒃᑯᓕᒫᓂᒃ ᐊᑦᑕᓇᖅᑐᒦᑦᑕᐃᓕᒪᑎᑦᓯᓂᕐᒥᒃ. ᑖᒪᓐᓇ ᐱᒋᐊᒃᑲᓐᓂᑎᑦᓯᓂᐅᔪᖅ ᒪᑯᓂᖓ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐃᓕᖅᑯᓯᖏᓐᓂᒃ, ᐅᖃᐅᓯᖏᓐᓂᒃ, ᑲᒪᕕᒻᒪᕆᖁᑎᖏᓐᓂᒃ, ᒪᓕᒐᖏᓐᓂᒃ, ᐊᑐᖅᑎᑕᑐᖃᖏᓐᓂᒃ, ᐊᒻᒪᓗ ᐊᑐᓲᖏᓐᓂᒃ ᑕᒪᓐᓇ ᐱᒋᐊᖃᓪᓚᕆᑉᐳᖅ ᐊᑦᑕᓇᖅᑐᖃᖁᓇᒍ, ᓱᔪᖃᖁᓇᒍ, ᐋᖅᑭᓱᖅᑕᐅᖃᑦᑕᖁᓪᓗᒋᑦ ᐊᒻᒪᓗ ᒪᒥᓴᖅᑕᐅᓗᑎᒃ.
- ᐃᖅᑲᓇᐃᔭᖃᑎᒌᓪᓗᓂ ᖃᐅᔨᒪᖃᑦᑕᐅᑎᓂᖅ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐃᓕᓴᖅᓯᕗᖅ ᐊᒻᒪᓗ ᑕᑯᑎᑦᓯᕗᖅ ᒪᓐᓇ ᐱᒻᒪᕆᐅᓂᖓᓂᒃ ᐱᕕᖃᕐᓇᖃᖃᑦᑕᕐᓂᖅ, ᐊᑐᕐᓂᖃᑦᓯᐊᖅᑐᓂᒃ, ᐱᐅᔪᒥᒃ−ᑲᒪᖃᑎᒌᑦᓯᐊᕐᓂᖅ ᐊᒻᒪᓗ ᑲᔪᓯᓯᒪᐃᓐᓇᖅᑐᒥᒃ ᐃᖅᑲᓇᐃᔭᖃᑎᒌᓐᓂᖏᑦ ᑖᒃᑯᐊᖑᔪᑦ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᒐᕙᒪᖏᑦ ᐊᒻᒪᓗ ᑭᒡᒐᑐᖅᑎᒋᔭᐅᔪᑦ ᑎᒥᖁᑏᑦ, ᐊᒻᒪᓗ ᐳᕌᕙᓐᓰᑦ, ᐊᕕᑦᑐᖅᓯᒪᔪᑦ, ᐊᒻᒪᓗ ᒐᕙᒪᑐᖃᒃᑯᑦ ᒐᕙᒪᒃᑯᖏᑦ, ᐊᑐᖅᑎᑦᓯᓕᕐᓗᑎᒃ ᐊᑯᓃᖅᑐᒥᒃ−ᐊᑐᕐᓂᐊᖅᑐᓂᒃ, ᐊᓯᔾᔩᔪᓂᒃ ᐊᒻᒪᓗ ᑲᔪᓯᓯᒪᑦᓯᐊᕈᓐᓇᖅᑐᓂᒃ ᓈᒻᒪᑦᑐᓂᒃ ᐊᓯᔾᔨᖅᑕᓂᒃ.
- ᐊᔾᔨᒌᓐᖏᓐᓂᖏᓐᓄᑦ−ᑐᓐᖓᕕᖃᖅᑐᑦ ᑲᒪᒐᓱᐊᕈᓯᐅᔪᑦ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐃᑲᔪᖅᓯᓯᒪᕗᖅ ᐃᒫᒃ ᐊᑐᓕᖅᑎᑕᐅᓂᖓᓄᑦ ᑕᐃᓐᓇ ᑲᑐᔾᔨᖃᑎᒌᕐᔪᐊᑦ ᓯᓚᕐᔪᐊᕐᒥᐅᑦ ᓇᓗᓇᐃᖅᓯᓂᒻᒪᕆᒥᓂᖏᑦ ᐃᒪᐃᓕᖓᓪᓗᑎᒃ ᐊᔾᔨᒌᓐᖏᓐᓂᖏᓐᓄᑦ−ᑐᓐᖓᕕᖃᖅᑐᒥᒃ ᑲᓚᒐᓱᐊᕈᓯᕐᒥᒃ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᓱᓇᐅᑎᑦᓯᕗᖅ ᑕᒪᒃᑯᓂᖓ ᖃᓄᐃᑦᑐᑐᐃᓐᓇᐅᓂᖏᓐᓂᒃ ᐃᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᒪᓕᒐᖏᑦ ᐊᒻᒪᓗ ᒪᓕᒐᓕᕆᓂᕐᒧᑦ ᐋᖅᑭᓱᖅᓯᒪᔭᖏᓐᓂᒃ, ᒪᓐᓇ ᓇᒻᒥᓂᖅ−ᐃᓱᒪᖅᓱᕈᓐᓇᓂᕐᒧᑦ ᐱᒋᐊᖃᕐᓃᑦ ᐊᒻᒪᓗ ᐱᒻᒪᕆᐅᑎᑕᐅᔪᑦ ᑕᒪᒃᑯᓄᖓ ᐊᓪᓚᓄᑦ, ᐃᓄᓐᓄᑦ ᐊᒻᒪᓗ ᐊᓪᓚᖓᔪᑦ ᒐᕙᒪᖏᓐᓄᑦ ᐊᒻᒪᓗ ᑭᒡᒐᑐᖅᑎᐅᓂᕐᒧᑦ ᑎᒥᖁᑎᓄᑦ, ᐊᒻᒪᓗᑦᑕᐅᖅ ᐱᒋᐊᖃᖅᑕᖏᓐᓂᒃ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐃᓄᖏᑕ ᑲᒪᒋᔭᐅᖃᑦᑕᖅᑐᓄᑦ ᒪᑯᓄᖓ ᑲᓇᑕᒥᐅᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐊᖅᑭᓱᖅᑕᐅᓯᒪᔪᓄᑦ. ᒪᓐᓇ ᐊᔾᔨᒌᓐᖏᓐᓂᖏᓐᓄᑦ−ᑐᓐᖓᕕᖃᖅᑐᒥᒃ ᑲᒪᒐᓱᐊᕈᓯᐅᔪᖅ ᐃᓚᒍᑦᓯᐅᔾᔨᕗᖅ ᐃᒪᐃᓪᓚᕆᒋᐊᖓᓂᒃ ᓇᓗᓇᐃᖅᓯᓂᕐᒥᒃ ᑕᒪᒃᑯᐊ ᓄᓇᖃᖅᑳᖅᓯᒪᔪᑦ ᐅᓪᓗᒥᐅᓕᖅᑐᖅ ᐊᖏᖃᑎᒌᒍᑎᑎᒍᑦ ᑲᒪᖃᑎᒌᑦᑐᑦ ᐊᔾᔨᒋᔭᐅᓐᖏᑦᑐᒥᒃ ᖃᐅᔨᒪᖃᑦᑕᐅᑎᓂᖃᖅᑯᑦ ᑖᒃᑯᓇᓐᖓ ᑲᓇᑕᒥᒃ ᐊᒻᒪᓗ ᐳᕌᕙᓐᓯᓂᒃ ᐊᒻᒪᓗ ᐊᕕᑦᑐᖅᓯᒪᔪᓂᒃ ᐱᔾᔪᑎᐅᓪᓗᓂ ᑖᒃᑯᐊ ᐅᓪᓗᒥᐅᓕᖅᑐᖅ ᐊᖏᖃᑎᒌᒍᑎᒋᓯᒪᔭᖏᓐᓄᑦ, ᑕᒪᒃᑯᐊᓗ ᐊᑐᐊᒐᕆᔭᐅᒋᐊᖃᖅᑯᑦ ᐊᖏᖃᑎᒌᒍᑎᒋᓯᒪᔭᖏᓐᓄᑦ ᑲᒪᖃᑎᒌᑦᑐᑦ ᑲᒪᒐᓱᐊᕈᓯᖏᓐᓂᒃ. ᒪᓐᓇ ᐊᔾᔨᒌᓐᖏᓐᓂᖏᓐᓄᑦ−ᑐᓐᖓᕕᖃᖅᑐᒥᒃ ᑲᒪᒐᓱᐊᕈᓯᐅᔪᖅ ᐊᒻᒪᓗᑦᑕᐅᖅ ᐃᒪᐃᓪᓚᕆᒋᐊᖓᓂᒃ ᓇᓗᓇᐃᖅᓯᕗᖅ ᐃᒫᒃ, ᑕᐃᒫᒃ ᓇᓗᓇᐃᖅᑕᐅᓯᒪᓪᓗᓂ ᑕᐃᑲᓂ ᑲᑐᔾᔨᖃᑎᒌᕐᔪᐊᒃᑯᓐᓂ ᓯᓚᕐᔪᐊᕐᒥᐅᑦ ᓇᓗᓇᐃᖅᓯᒻᒪᕆᑦᓯᒪᓂᖏᑦ, ᓄᓇᖃᖅᑳᖅᓯᒪᔪᑦ ᐃᓄᖏᑦ ᐱᒍᓐᓇᐅᑎᖃᕆᐊᖏᑦ ᐃᓚᐅᑎᕈᓐᓇᓂᕐᒥᒃ ᒪᑯᑎᒎᓇ ᑭᒡᒐᑐᖅᑎᖏᑎᒍᑦ ᓂᕈᐊᖅᓯᒪᔭᒥᓐᓂᒃ ᓇᒻᒥᓂᖅ ᒪᓕᑦᓱᑎᒃ ᓇᒻᒥᓂᕆᔭᒥᓐᓂᒃ ᑲᒪᒐᓱᐊᕈᓯᐅᔪᓂᒃ.
- ᐃᖅᑲᖅᑐᐃᕕᓕᕆᓂᖅ ᐊᑲᐅᓇᖅᑐᒨᕐᓇᕐᓂᖓ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐱᒐᓱᐊᖅᑯᖅ ᒪᑯᐊ ᓯᕗᒧᐊᑦᑎᑕᐅᓂᖏᓐᓂᒃ ᐊᓯᔾᔩᑎᑦᓯᒍᓐᓇᖅᑐᑦ ᐋᖅᑭᑦᓱᐃᑏᑦ ᑕᒪᒃᑯᓂᖓ ᐱᑦᓯᐊᖅᑕᖃᖅᑐᓂᒃ ᐊᒻᒪᓗ ᓴᐳᔾᔨᔪᓂᒃ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᑐᑭᓯᒪᔭᖏᓐᓂᒃ ᒪᑦᓱᒥᖓ ᐃᖅᑲᖅᑐᐃᕕᓕᕆᓂᕐᒥᒃ, ᐃᓚᒋᔭᐅᓪᓗᑎᒃ ᐱᒋᐊᖃᕐᓂᖅ ᐅᑎᑦᓯᐊᖅᑎᑕᐅᓂᖓᓂᒃ ᐃᓄᒃ ᐊᒻᒪᓗ ᐊᑕᖏᖅᑐᒥᒃ ᐊᑲᐅᓇᖅᑐᒨᖅᑎᑕᐅᓂᖓᓂᒃ.
- ᐃᓱᒪᒋᔭᐅᒋᐊᖃᕐᓂᖓ ᖃᓄᓕᒫᖅ ᐃᓄᒃ ᒪᒥᓴᖅᑕᐅᖁᓪᓗᒍ ᐊᓐᓂᐊᖓ ᑲᒪᒐᓱᐊᕈᓯᖅ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐱᒐᓱᐊᖅᑯᖅ ᒪᑯᐊ ᓯᕗᒧᐊᖅᑎᑕᐅᓂᖏᓐᓂᒃ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᓇᒻᒥᓂᖅ−ᐃᓱᒪᖅᓱᕈᓐᓇᕐᓂᖏᓐᓂᒃ ᒪᑯᑎᒎᓇ ᐃᕿᑦᓯᓗᑎᒃ ᑐᑭᓯᒪᓂᐅᔪᓂᒃ ᒪᑯᓂᖓ ᐃᖅᑲᖅᑐᐃᕕᓕᕆᓂᕐᒧᑦ ᑐᓐᖓᕕᖃᑦᓯᐊᖅᑐᓂᒃ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐃᓕᖅᑯᓯᖏᓐᓄᑦ, ᐊᑐᖅᑎᑕᑐᖃᖏᓐᓄᑦ, ᒪᓕᒐᖏᓐᓄᑦ ᐊᒻᒪᓗ ᒪᓕᒐᓕᕆᓂᕐᒧᑦ ᐋᖅᑭᓱᖅᓯᒪᔭᖏᓐᓄᑦ ᐊᒻᒪᓗ ᑲᒪᒋᒻᒪᕆᖁᑎᖏᓐᓄᑦ. ᑖᓐᓇ ᐋᖅᑭᑦᓱᐃᑎᐅᒐᓱᐊᖅᑐᖅ ᐃᓚᒍᑦᓯᐅᔾᔨᕗᖅ ᑕᐅᑐᑦᑕᖃᕋᓱᐊᕐᓂᕐᒥᒃ ᒥᑦᓵᓄᑦ ᐱᒋᐊᒃᑲᓐᓂᖅᑎᑕᐅᓂᖏᓐᓂᒃ ᑕᒪᒃᑯᐊ ᐃᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐃᓕᖅᑯᓯᖏᑦ, ᐃᓅᓯᖏᑦ, ᐃᓚᒌᑦ ᐊᒻᒪᓗ ᖃᐅᔨᒪᖃᑦᑕᐅᑎᓂᖏᑦ ᐊᒻᒪᓗ ᐃᑲᔪᖅᑐᐃᓪᓗᑎᒃ ᒪᑐᒥᖓ ᐃᓱᒪᒋᔭᐅᒋᐊᖃᕐᓂᖓ ᖃᓄᓕᒫᖅ ᐃᓄᒃ ᒪᒥᓴᖅᑕᐅᖁᓪᓗᒍ ᐊᓐᓂᐊᖓ ᑲᒪᒐᓱᐊᕈᓯᕐᒥᒃ ᐃᖅᑲᖅᑐᐃᕕᓕᕆᔨᒃᑯᑦ ᑐᕌᒐᖃᕐᓗᑎᒃ ᓵᓐᖓᑦᓯᓂᕐᒥᒃ ᐱᔾᔪᑎᓪᓚᕆᐅᕙᑦᑐᓂᒃ ᐃᒪᐃᑐᑰᖅᑐᓄᑦ ᒪᑯᐊ ᑲᑉᐱᐊᓇᖅᑐᑰᖅᑐᑦ, ᐱᕋᔭᑕᐅᔪᑦ ᐊᒻᒪᓗ ᐱᒋᐊᖃᕐᓂᕐᒥᒃ ᐅᑎᖅᑎᑕᐅᓂᖏᓐᓂᒃ ᐃᓅᑉ ᐊᒻᒪᓗ ᐃᓄᓕᒫᑦ ᖃᓄᐃᖏᑦᓯᐊᕆᐊᖃᕐᓂᖏᑦ. ᑕᒪᓐᓇ ᐃᓚᒍᑦᓯᐅᔾᔨᕗᖅ ᐃᒪᐃᓪᓚᕆᒋᐊᖓᓂᒃ ᓇᓗᓇᐃᖅᓯᓂᕐᒥᒃ ᒪᑯᓂᖓ ᐊᔾᔨᒌᓐᖏᓐᓂᖏᓐᓂᒃ ᑕᐅᑐᒐᓱᐊᕈᓯᐅᔪᑦ ᐊᑦᑐᐊᔪᑦ ᒪᑯᓄᖓ ᓯᐊᕈᐊᓗᕐᓂᓴᕐᓄᑦ, ᓇᒦᕝᕕᐅᔪᓄᑦ ᐊᒻᒪᓗ ᖃᐅᔨᒪᖃᑦᑕᐅᑎᓂᖏᓐᓄᑦ ᑕᒪᑦᓱᒧᖓ ᓄᓇᒧᑦ ᐊᒻᒪᓗ ᐊᕙᑎᒧᓪᓗ, ᑕᐃᒫᓪᓗ ᑐᓐᖓᕕᒋᔭᐅᓪᓗᓂ ᑕᒪᒃᑯᓄᖓ ᐊᒥᓱᓄᑦ ᓄᓇᖃᖅᑳᖅᓯᒪᔪᑦ ᒪᓕᒐᓕᕆᓂᕐᒧᑦ ᐋᖅᑭᓱᖅᓯᒪᔭᖏᓐᓄᑦ ᐊᒻᒪᓗ ᐃᓱᒪᒋᒐᓱᐊᓲᖏᓐᓄᑦ ᑕᒪᑦᓱᒧᖓ ᐃᖅᑲᖅᑐᐃᕕᓕᕆᓂᕐᒧᑦ.
- ᓴᓐᖏᓂᕆᔭᐅᔪᓄᑦ ᑐᓐᖓᕕᖃᖅᑐᑦ, ᑲᑉᐱᐊᓇᖅᑐᓕᕆᓂᕐᒧᑦ−ᑐᑭᓯᒪᑦᓯᐊᕐᓂᖅ, ᐃᓕᖅᑯᓯᕆᔭᓄᑦ ᐊᑦᑕᓇᓐᖏᑦᑐᓂᒃ ᐊᒻᒪᓗ ᓈᒻᒪᓯᐊᖅᑐᓂᒃ ᐃᑳᕐᕕᖃᖃᑦᑕᓂᕐᒥᒃ ᑲᒪᒐᓱᐊᕈᓯᖃᕐᓗᑎᒃ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐱᒐᓱᐊᖅᑯᖅ ᒪᑭᒪᑦᓯᓂᕐᒥᒃ ᒪᑦᓱᒥᖓ ᐱᒻᒪᕆᐅᓂᖏᓐᓂᒃ ᑕᒪᒃᑯᐊ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐃᓄᖏᑦ ᑕᒪᒃᑯᐊ ᑲᒪᒋᔭᐅᖃᑦᑕᑎᓪᓗᒋᑦ ᑕᒪᒃᑯᓄᖓ ᐃᖅᑲᖅᑐᐃᕕᓕᕆᓂᕐᒧᑦ ᐊᖅᑭᓱᖅᑕᐅᓯᒪᔪᓄᑦ ᐊᒻᒪᓗ ᐃᓘᓐᓇᖏᓐᓂᒃ ᓱᔪᖃᑦᑕᐃᓕᑎᑦᓯᒐᓱᐊᕈᑎᓄᑦ, ᖃᓗᐃᒍᓪᓃᓂᖅᓴᐅᒐᓱᐊᕐᓂᕐᒧᑦ ᐊᒻᒪᓗ ᒪᒥᓴᕐᓂᕐᒧᑦ ᐱᔨᑦᓯᕋᐅᑎᓄᑦ ᐊᒻᒪᓗ ᓴᐳᔾᔨᓯᒪᒐᓱᐊᕈᑎᓄᓪᓗ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐱᒐᓱᐊᖅᑯᖅ ᐃᓕᓴᖅᓯᓂᕐᒥᒃ ᒪᑯᓂᖓ ᐊᔾᔨᒋᔭᐅᓐᖏᑦᑐᒥᒃ ᖃᓄᐃᑦᑐᒦᑦᑐᑦ ᑕᒪᒃᑯᐊ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐃᓄᖏᑦ ᐃᒪᐃᑦᑐᑦ ᓇᐅᒃᑰᖓᖅᑎᑕᐅᔪᒥᒃ ᖃᐅᔨᒪᔭᐅᒍᑎᖃᖅᑐᑦ, ᐃᓚᒋᔭᐅᓪᓗᑎᒃ ᐃᓐᓇᑐᖃᐃᑦ, ᐊᕐᓇᐃᑦ, ᐅᕕᒃᑲᐃᑦ, ᓱᕈᓰᑦ, ᑭᓇᒃᑯᑦ ᒪᒃᑯᐊ ᐃᓗᓯᕐᓗᒍᑎᖃᖅᑐᑦ ᐊᒻᒪᓗ ᒪᕐᕉᓐᓂᒃ, ᑕᕐᓂᓖᑦ, ᐊᕐᓇᐅᔭᐃᑦ, ᐊᖑᑎᐅᔭᐃᑦ, ᓇᓕᐊᓐᓄᕋᖅᑐᑦ, ᐊᕐᓇᐅᖔᕈᒪᔪᑦ ᐊᖑᑎᐅᖔᕈᒪᔪᑦ, ᐊᔾᔨᒋᔭᐅᓐᖏᑦᑐᑦ, ᑕᒪᒃᑮᑦᓯᔪᑦ ᐊᕐᓇᐅᓂᕐᒧᑦ ᐊᖑᑎᐅᓂᕐᒧᓪᓘᖓᔾᔪᑎᓖᑦ ᑎᒥᖏᑦ, ᐊᖑᑎᐅᔭᐃᑦ ᐊᓯᖏᓪᓗ ᐃᓄᐃᑦ, ᖃᐅᔨᒪᒐᓱᐊᕆᐊᕐᓗᒍ ᑕᒪᓐᓇ ᐱᒋᐊᖃᕐᓂᖓ ᐊᔾᔨᒋᔭᐅᓐᖏᑦᑐᒥᒃ ᐃᓕᖅᑯᓯᓕᕆᓂᕐᒧᑦ ᐃᑉᐱᒋᓱᑦᓯᐊᕋᓱᐊᕆᐊᖃᕐᓂᕐᒥᒃ ᐊᒻᒪᓗ ᒪᒥᓴᕐᓂᒥᓪᓗ ᒪᓐᓇ ᒥᑭᓪᓕᑎᖅᓯᒪᔭᐅᖁᓪᓗᒍ ᖃᓄᐃᓪᓗᐊᕐᓂᕆᔭᖓ ᒪᑯᐊ ᐱᕋᔭᕈᓕᒡᒋᐊᖃᑦᑕᖅᑐᑦ. ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᒐᕙᒪᖏᑦ ᐊᒻᒪᓗ ᑭᒡᒐᑐᖅᑎᒋᔭᐅᔪᑦ ᑎᒥᖁᑏᑦ ᑕᒪᒃᑯᐊ ᐊᑲᐅᓈᖅᓯᒪᓂᖅᐹᒥᒃ ᑲᒪᒍᓐᓇᕐᓂᖃᖅᑯᑦ ᐱᑎᑦᓯᒍᓐᓇᓂᕐᒥᒃ ᑕᒪᒃᑯᐊ ᐃᓕᖅᑯᓯᕆᔭᐃᑦ ᐃᑉᐱᔭᐅᑦᓯᐊᖁᓪᓗᒋᑦ ᐊᒻᒪᓗ ᒪᒥᓴᖅᑕᐅᓗᑎᓪᓗ. ᑖᓐᓇ ᐊᖅᑭᑦᓱᐃᑎᐅᒐᓱᐊᖅᑐᖅ ᖃᐅᔨᒪᒐᓱᐊᖅᑯᖅ ᒪᑯᓂᖓ ᐃᓱᒪᒋᔭᐅᒐᓱᐊᕆᐊᓕᓐᓂᒃ ᑐᕌᖓᔪᓂᒃ ᐱᒋᐊᓕᓐᓂᒃ, ᐊᑐᖅᑕᐅᓯᒪᔪᓂᒃ, ᑭᓇᒃᑰᓂᕋᐃᔪᓂᒃ, ᐱᒍᓐᓇᕐᓂᕆᔭᓂᒃ ᐊᒻᒪᓗ ᖃᐅᔨᒪᔭᓂᒃ ᑕᒪᒃᑯᓂᖓ ᐃᓄᓐᓂᒃ ᐊᒻᒪᓗ ᓄᓇᓕᒋᔭᐅᔪᓂᒃ ᐊᒻᒪᓗ ᐱᒐᓱᐊᓚᖓᕗᑦ ᑎᒍᓯᓂᕐᒥᒃ ᐃᓚᒋᔭᐅᑎᑦᓯᓯᐊᕐᓂᕐᒥᒃ ᐊᒻᒪᓗ ᐊᔾᔨᒋᔭᐅᓐᖏᑦᑐᒥᒃ ᖃᓄᐃᑦᑐᒦᑦᑐᓂᒃ ᑲᒪᒐᓱᐊᕈᓯᐅᔪᒥᒃ ᑕᐃᒫᒃ ᐃᓱᒪᒋᔭᐅᒐᓱᐊᕐᓗᑎᒃ ᑕᒪᒃᑯᐊ ᐃᓅᓯᕆᔭᐅᔪᓂᒃ ᖃᐅᔨᑎᑦᓯᒍᑎᐅᔪᓂᒃ ᑕᒪᒃᑯᓂᖓ ᓇᐅᒃᑰᖔᖅᑎᑕᐅᔪᒥᒃ ᖃᐅᔨᒪᔭᐅᒍᑎᖃᖅᑐᑦ.
- ᐱᕕᖃᖅᑎᑕᐅᓂᖅ ᐃᖅᑲᖅᑐᐃᕕᓕᕆᔨᒃᑯᓐᓂᒃ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐱᒐᓱᐊᖅᑯᖅ ᒥᑭᓪᓕᑎᕆᓂᕐᒥᒃ ᐊᕝᕕᐊᕈᑎᐅᖃᑦᑕᖅᑐᓂᒃ ᐃᖅᑲᖅᑐᐃᕕᓕᕆᓂᕐᒨᖓᔪᓂᒃ ᐊᒻᒪᓗ ᐱᑎᑦᓯᓗᓂ ᐱᑕᖃᕐᓂᖅᓴᓂᒃ ᓄᓇᖃᖅᑳᖅᓯᒪᔪᓄᑦ−ᓯᕗᓕᖅᑕᓂᒃ, ᐃᓕᖅᑯᓯᕆᔭᓄᑦ ᐊᑦᑕᓇᓐᖏᑦᑕᓂᒃ ᐊᒻᒪᓗ ᓈᒻᒪᓯᐊᖅᑐᓂᒃ, ᑲᑉᐱᐊᓇᖅᑐᑰᖅᓯᒪᔪᓂᒃ−ᑐᑭᓯᒪᔪᓂᒃ, ᐃᖅᑲᖅᑐᐃᕕᓕᕆᓂᕐᒨᖓᔪᓂᒃ ᓴᐳᔾᔨᓯᒪᒍᑎᓂᒃ ᑕᒪᒃᑯᓄᖓ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐃᓄᖏᑦ ᑲᒪᒐᓱᐊᖅᑐᓄᑦ ᑕᒪᒃᑯᓂᖓ ᑲᓇᑕᒥᐅᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᓱᖅᓯᒪᔭᖏᓐᓂᒃ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐃᓕᓴᖅᓯᕗᖅ ᑕᒪᒃᑯᐊ ᐃᒫᓪᓚᕆᒃ ᐱᑕᖃᓗᐊᓕᕐᓂᖏᑦ ᑕᒪᒃᑯᓂᖓ ᐊᓪᓚᓂᒃ, ᐃᓄᓐᓂᒃ ᐊᒻᒪᓗ ᐊᓪᓚᖓᔪᑦ ᐃᓄᖏᓐᓂᒃ ᐃᓗᐊᓂ ᑲᓇᑕᒥᐅᑦ ᐱᕋᔭᑦᑐᒥᓂᕐᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᓱᖅᑕᐅᓯᒪᔪᓂ ᑕᒪᒃᑯᐊ ᐱᓗᐊᓕᖅᑯᑦ ᑕᐃᒫᓪᓗ ᐱᒋᐊᖃᕈᑎᐅᓕᖅᑯᖅ ᐊᓯᔾᔨᖅᓯᒪᔪᒥᒃ ᑲᒪᒐᓱᐊᕈᓯᕐᒥᒃ ᑲᒪᒋᔭᐅᖁᓪᓗᒋᑦ ᐃᖅᑲᖅᑐᐃᕕᓕᕆᔨᒃᑯᓐᓄᑦ.
- ᐊᐅᓚᑕᐅᓂᖓ ᑕᒪᓐᓇ ᐃᖅᑲᖅᑐᐃᕕᓕᕆᓂᖅ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐱᒐᓱᐊᖅᑯᖅ ᓯᕗᒧᐊᑦᑎᑦᓯᓂᕐᒥᒃ ᒪᑯᓂᖓ ᐱᒻᒪᕆᐅᓂᖅᐹᖁᑎᖏᓐᓂᒃ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᓄᓇᓕᖏᑕ ᐅᑎᖅᑎᑦᓯᖁᓪᓗᒋᑦ ᑲᒪᕕᒋᒍᓐᓇᖅᑕᖏᓐᓂᒃ ᑕᒪᒃᑯᓂᖓ ᐊᐅᓚᑕᐅᓂᖏᓐᓂᒃ ᑕᒪᒃᑯᐊ ᐃᖅᑲᖅᑐᐃᕕᓕᕆᓂᕐᒨᖓᔪᑦ ᐃᖅᑲᓇᐃᔭᖃᑎᖃᕐᓗᑎᒃ ᒪᑯᓂᖓ ᐳᕌᕙᓐᓯᓂᒃ ᐊᒻᒪᓗ ᐊᕕᑦᑐᖅᓯᒪᔪᓂᒃ, ᐊᒻᒪᓗ ᐱᒻᒪᕆᕈᕆᐊᒃᑲᓐᓂᖅᑎᑕᐅᓗᑎᒃ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᒪᓕᒐᖏᑦ, ᒪᓕᒐᓕᕆᓂᕐᒧᑦ ᐊᑐᐊᒐᖏᑦ, ᒪᓕᒐᓕᕆᓂᕐᒧᑦ ᑲᒪᕕᒻᒪᕆᖏᑦ, ᒪᓕᒐᓕᕆᓂᕐᒧᑦ ᐊᖅᑭᓱᖅᓯᒪᔭᖏᑦ ᐊᒻᒪᓗ ᓯᐊᕈᐊᓗᕐᓂᓴᖁᑎᖏᓐᓗ.
- ᐊᑯᓃᓚᖓᔪᒥᒃ−ᖃᓄᑎᒌᕐᓂᖃᖅᑐᒥᒃ ᐊᒻᒪᓗ ᓇᓗᓇᓐᖏᑦᑐᑦ ᑮᓇᐅᔭᖅᑖᕕᑦᓴᐃᑦ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐃᒪᐃᓪᓚᕆᒋᐊᖓ ᓇᓗᓇᐃᖅᓯᕗᖅ ᑕᒪᒃᑯᐊ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᒐᕙᒪᖏᑦ ᐊᒻᒪᓗ ᑭᒡᒐᑐᖅᑎᐅᓂᕐᒧᑦ ᑎᒥᖁᑎᖏᑦ ᐱᒋᐊᖃᖃᑦᑕᖅᑯᑦ ᐱᕕᖃᕈᓐᓇᓂᕐᒥᒃ ᑲᔪᓯᓯᒪᐃᓐᓇᖅᑐᓂᒃ, ᐊᑯᓃᖅᑐᒥᒃ−ᖃᓄᑎᒌᓐᓂᖃᖅᑐᓂᒃ ᐊᒻᒪᓗ ᐊᓯᔾᔨᓱᐃᑦᑐᓂᒃ ᑮᓇᐅᔭᓂᒃ ᐱᕕᑦᓴᓂᒃ ᐱᒍᓐᓇᖃᑦᑕᖁᓪᓗᒋᑦ ᑖᒃᑯᐊ ᑲᒪᒋᒋᐊᓕᒥᓐᓂᒃ ᐊᒻᒪᓗ ᑲᒪᒋᒍᒫᕐᓂᐊᖅᑕᖏᓐᓂᒃ ᐊᒻᒪᓗ ᐃᑉᐱᒍᓱᑦᓯᐊᕈᓐᓇᖁᓪᓗᒋᑦ ᐃᓄᐃᑦ ᖃᓄᐃᓐᖏᓯᐊᖃᑦᑕᖁᓪᓗᒋᑦ ᐊᒻᒪᓗ ᐱᒍᓐᓇᖃᑦᑕᖁᓪᓗᒋᑦ ᒪᑭᒪᑦᓯᐊᕈᓐᓇᓂᕐᒥᒃ.
- ᓇᓗᓇᐃᔭᐃᒍᓐᓇᕆᐊᖃᕐᓂᖅ. ᑖᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐃᒪᐃᓪᓚᕆᒋᐊᖓ ᓇᓗᓇᐃᖅᓯᕗᖅ ᑕᒪᓐᓇ ᓇᓗᓇᐃᔭᐃᒍᓐᓇᕆᐊᖃᕐᓂᖅ ᐱᒻᒪᕆᐅᒋᐊᖓᓂᒃ ᒪᑯᐊ ᐱᒍᓐᓇᖅᓯᔭᐅᒍᓐᓇᖁᓪᓗᒋᑦ ᐊᓯᔾᔩᒍᑎᐅᔪᓄᑦ ᑐᕌᒐᕆᔭᖏᑦ ᑖᑦᓱᒪ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑑᑉ. ᑲᒪᒋᒐᑦᓴᐅᒍᓐᓇᖅᑐᓂᒃ ᐊᒻᒪᓗ ᑲᔪᓯᓯᒪᑦᓯᐊᕈᓐᓇᖅᑐᓂᒃ ᐊᑐᓕᖅᑎᑦᓯᓂᖅ ᑕᒪᓐᓇ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐋᖅᑭᑦᓱᐃᑎᐅᒐᓱᐊᖅᑐᖅ ᐃᓚᒍᑦᓯᐅᔾᔨᒋᐊᖃᖅᑯᖅ ᑲᒪᖃᑎᒌᓐᓂᒃᑯᑦ−ᐱᕙᓪᓕᐊᑎᑕᐅᓯᒪᔪᓂᒃ ᖃᐅᔨᒐᓱᐊᕐᓂᕐᒧᑦ ᓴᓇᕐᕈᑎᓂᒃ ᐊᒻᒪᓗ ᐋᖅᑭᓱᖅᓯᒪᔪᓂᒃ ᑕᒪᒃᑯᓂᖓ ᑕᑯᑎᑦᓯᔪᓂᒃ ᐊᓪᓚᐃᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᐊᑐᓲᖏᓐᓂᒃ ᒪᑯᓂᖓ ᖃᐅᔨᒪᓂᐅᔪᓂᒃ, ᑐᑭᓯᒪᔭᖏᓐᓂᒃ ᐊᒻᒪᓗ ᒪᒥᓴᐅᑎᖏᓐᓂᓪᓗ.
- Date modified: